Durante un conferencia di prensa, John Hart, Presidente di ‘Fundacion Mito Croes’, a splica cu Raad van Advies (RvA) den nan jaarverslag di aña 2023, a indica cu e conceptonan di ley cu Gabinete Wever-Croes a presenta na RvA despues di COVID, no ta duna indicacion cu gobierno tin un vision macro-economico bon pensa. RvA ta fungi como e consehero independiente principal di Gobierno y Parlamento riba tereno di legislacion y gobernacion. E organo importante aki ta analisa tur ley cu gobierno kier entrega na Parlamento y pa e motibo ey tin un bon bista riba kico gobierno kier haci y kico e pensamento di gobierno tras di cada ley ta.
Ademas RvA ta remarca cu e crecemento di e economia di Aruba despues di COVID, no a bay den un relacion proporcional cu e desaroyo financiero den hopi hogar. Specialmente cu esunnan mas vulnerabel. Cu otro palabra, e economia di Aruba a crece, pero casnan di famia no a probecha di e crecemento aki. Hopi hogar na Aruba ta p’esey bou di un presion financiero inmenso. Si un salario minimo no ta suficiente pa garantisa un existencia husto, esey ta un problema serio. Si hende tin cu haci prestamo pa cubri gastonan regular pa por sobrevivi, cu e consecuencia cu nan ta crea mas debe, esey ta un problema mas grandi ainda.
Si combina e dos factornan aki cu e costo di bida halto na Aruba a consecuencia di medidanan cu gobierno a tuma, e ta significa cu hende ta wordo forsa pa biba den un situacion sin perspectiva. E situacion dificil aki ta reina den hopi cas na Aruba. E situacion sin perspectiva aki pa tanto ciudadano y famia mester di atencion urgente! Un gobierno tin e obligacion constitucional pa garantisa un existencia husto pa esunnan mas vulnerabel y pa evita cu hogarnan ta cay den situacionnan sin perspectiva. Esey no ta e caso na Aruba mas.
Fundacion Mito Croes a reuni den e ultimo simannan cu diferente stakeholdernan pa asina den un forma participativo haya un miho impresion di e sentimento general den comunidad. Lo haci estudionan cualitativo y cuantitativo pa compila datonan necesario pa por formula ‘position papers’ como conseho na partido AVP. Esakinan lo yuda crea e perspectiva nobo cu partido AVP ta creando pa Aruba.
Hart hunto cu e miembronan di Fundacion Mito Croes lo sigui reuni den e simannan binidero cu diferente persona, grupo y organisacion pa asina yuda desaroya solucionnan cu lo contribui na un vision macro-economico duradero y mas husto pa henter Aruba.
