Presidente di Fundacion Mito Croes y miembro di AVP, John Hart ta bisa cu no mucho tempo pasa el a cumpra un producto na un supermercado anto ora el a yega cas el a constata cu e producto aki a caduca. No tin algo mas fastioso ora cu bo tin cu habri un lechi anto el a caduca. Ora cu mira e gobierno actual, Hart ta bisa cu nan fecha di caduca tambe a yega pa loke ta e coalicion aki.
“E dificil ta cu nos ta deal cu e efecto ora un lechi caduca. Nos ta deal cu efectonan di un coalicion cu su fecha di caduca a yega su final. Ora cu nos menciona e dies puntonan aki y con nan a presenta nan, ta simbolico tambe p’e decadencia cu tin.” Hart ta subraya tambe cu den e ultimo simannan, Fundacion Mito Croes a tene hopi combersacion cu hendenan den comunidad, cu nan mes ta acerca Hart – no solamente na Aruba pero tambe den exterior puntrando riba con nan por contribui.
“E ta momentonan crucial na pais Aruba pasobra cu si nos evalua e rapportnan menciona, anto e sentimento cu ta biba – bo lo bisa e ta algo hopi subhetivo. Pero nos tin institutonan renombra tambe na Aruba manera Raad van Advies cu ta pone un tiki e pulso cu ta biba den nos comunidad. Ora cu tira un bista den Raad van Advies su Jaarverslag di 2023, tin un punto cu ta subraya e parti cu si un ciudadano no por gana suficiente placa pa por cubri su gastonan di bida, cu mester tambe fia placa y ta na su turno keda biba den debe, den combinacion cu aumento den prijsnan, lo haci e situacion bay for di control cu tur consecuencianan negativo social.
Segun Hart, na momento bo yega na un caya cu no tin salida, bo mester por tin bosnan cu ta bin cu contenido y solucionnan pa trece speransa nobo. Fundacion Mito Croes conhuntamente cu partido AVP ta trahando hopi intensivo cu un team di profesionalnan dedica na solucionnan pa Aruba. “Mi tin cu bisa cu e trabaonan ta birando mas intenso. E puntonan menciona ta bibando den comunidad, nos tambe ta haciendo estudionan pa haya data y haci analisis, hiba bek n’e partido anto formula e direccion nobo cu Aruba mester.”
Hart ta bisa cu scuchando su coleganan den AVP, y sigur den ultimo simannan na un bishita cu el a haci na Hulanda, e ta yen’e cu perspectiva y speransa pasobra e sa cu e partido ta trahando riba solucionnan duradero. Esey ta algo cu Hart ta expresa cu tin falta di un vision macro-economico duradero, anto eynan nos ta y eynan ta trahando riba dje. “Importante ta pa sa cu nos ta poniendo enfoke riba pilarnan sumamente importante. E parti di solidaridad lo refleha bek den e maneho, e parti di un responsabilidad comparti tambe lo refleha bek den e manehonan aki. No lubida, na final di dia nos ta haci esaki cu pensamento di Cristian Democrata, cu ta basicamente e compas cu ta guia nos di e bon comun,” segun Hart.
