Diaranson atardi autoridadnan a cera L.G. Smith Boulevard temporalmente entre skina di DOW y Royal Plaza. Esaki ta pa motibo di un auto cu su motor a cende na candela. E ciere di caminda tabata den spera di unidad di Cuerpo di Bombero.
E chauffeur masculino di edad madura tabata riba caminda na momento cu e auto a cuminsa saca huma for di bou di e hood. Rapidamente el a hala un poco band’i caminda y sali for di e auto marca Jeep, modelo Wrangler, color blanco.
Polis cu normalmente ta patruya e area di waf crucero a yega di a biaha y a pidi pa Brandweer tambe presenta. Esey a sosode tambe despues di algun minuut y, manera e potretnan ta ilustra, a paga e vlamnan cu tabata sali for di e parti dilanti di e auto.
Afortunadamente e unico ocupante no a resulta herida. Sinembargo, e tabata visiblemente impacto pa e suceso. Testigonan cu a combersa cu ne a comparti cu el a cumpra e vehiculo apenas dos siman pasa y a caba di sali for di e mesun garashi cu el a cumpr’e algun minuut prome.
Naturalmente e incidente aki a hala hopi atencion di e turistanan den e area cu tabatin oportunidad di wak nos polis y bomberonan den accion. Hopi a saca potret y video y ta bay awo cu un storia adicional pa conta di nan bishita na Aruba.
