Despues di su actividadnan na Corsou, Prinses Beatrix a yega Aruba diahuebs y di biaha su dia a cuminsa, entre otro na Neptali Henriquez Park caminda cu el a topa cu entre otro director di Jantje Beton y tambe Cede Aruba. Ta conoci cu Su Altesa Real tin un luga special pa mucha den su curason y ta patrono di diferente organisacion. Durante di su bishita na Neptali Henriquez Park, Postcode Lotterij a haci un donacion substancial na e proyecto entre e dos organisacionnan aki pa bin cu diferente parke pa mucha hunga den dje.
JANTJE BETON
Esey ta loke e ta pa Jantje Beton tambe. Prinses Beatrix desde 1971 ta un ‘beschermvrouw’ of patrona di Jantje Beton , pasobra e ta haya cu ta hopi importante pa por atende cu tur mucha den reino tur dia por hunga pafo. Segun Dave Ensberg-Kleijkers, director di Nationaal Jeugdfonds Jantje Beton, jammer cu no por mira esaki riba e islanan di reino.
Na Aruba por mira esaki na Pariba di brug, na Santa Cruz caminda cu tin poco luga caminda e muchanan por hunga pafo. Un bunita espacio pa wega manera Neptali Henriquez Park no tin hopi caminda y esey ta algo cu kier cambia.
Hunto cu Cede Aruba, Jantje Beton lo bay realisa esaki y danki na Postcode Lotterij a haya fondo pa haci esaki. Den e proximo añanan lo bay cumpli cu esaki, p’asina e muchanan por crece na un manera sano pasobra nan merece esey. Nan merece tur lo miho di loke tin di ofrece den reino, Ensberg-Kleijkers a indica.
CEDE ARUBA
Cede Aruba tambe tabat’ey presente durante e recepcion pa Prinses Beatrix. Segun director di e institucion, Daniel Tecklenborg, e ta hopi contento cu e colaboracion cu Jantje Beton y cu a haya atencion di Prinses Beatrix.
E colaboracion a cuminsa na 2022, unda cu a bishita Stichting Jantje Beton na Hulanda y a conta cu nan a bira activo den Caribe Hulandes, esta Boneiro, Saba, Sint Eustatius. Tecklenborg a comenta cu a puntra si por colabora cu nan. A haci un investigacion na februari.
A bay diferente scol, reuni cu diferente stakeholder y mira cuanto speeltuin tin. Tin na Aruba pero tin hopi a bay atras, y mirando cu e poblacion a crece, tin mas mucha tambe. No ta tur caminda tin bon luga.
