E conocido actor, cantante, presentador y comediante Jandino Asporaat actualmente ta riba un tour mundial. Ya caba el a presenta na Hulanda, Turkia y lo sigui awo pa Surnam, Aruba, Boneiro y Curacao. Aruba lo haya e oportunidad di mira e show aki, diaranson 24 di augustus 2022 na Renaissance Convention Center. Ta trata di e show ‘Perspectief’. Despues di a presenta pa diferente sala completamente bendi na Hulanda, e show ta conoce un stage internacional.
Jandino ta comenta: “Mi a cuminsa e tour mundial aki cu un solo meta, cual ta kibra tur expectativa di e publico. Na diferente pais rond mundo e publico lo bini hunto pa asina pasa un anochi formidabel y esey ta exactamente loke mi ta bay entrega na nan. Mi curason y pulmon lo keda riba cada stage na final di cada anochi. E lo bira un fiesta grandi, sin distingui na unda di mundo nos ta.”
E titulo di e solo-show aki ta ‘Perspectiva’ y lo ta na Hulandes. Den e show aki Jandino ta papia riba diferente perspectiva. Bo lo ta sorprendi pa sa cuanto bo lo por siña di diferente situacion si bo no biba cu un mentalidad di ‘ami semper tin rason’. E ta benificioso pa mira cada cos for di un perspectiva diferente. “Specialmente cu awor rond mundo e ta importante pa mira tur situacion for di un otro of diferente perspectiva. E realidad/berdad ta den wowo di e observador/ publico y ta depende for di cual angulo bo mira e situacion. Mi ta cla pa subi e stage cu hopi focus, cu basta locura pero specialmente habri pa otro perspectiva”, Jandino a comenta.
Algo unico e biaha aki ta cu despues di e show cu ta cuminsa 8:00 di anochi lo tin un after party cu Dj Willy. Aki lo tin e oportunidad tambe pa topa cu Jandino.
Carchi pa e show e.o na Curacao y Surinam ya a conoce un sold out, te cu a pone show extra y pa loke ta Aruba esakinan ta den nan fase final. Esey kiermen cu no a resta hopi carchi mas. Por haya carchi na Superfood, Citgo Boulevard, Citgo Essovile y Pay.aw.
Jandino Asporaat a nace na Corsou na aña 1981 y a muda pa Hulanda durante e decada di 90. Na 2002 el a cuminsa su carera den teatro y a sigui crece den diferente disciplina di arte, pelicula, teatro, television y hopi mas.
