Oneil Williams, di descendencia Jamaiquino, tabata e motor tras di e celebracion di diasabra ultimo den caya di San Nicolas, pa recorda fecha di independencia di e isla Ingles aki den Caribe.
Tin un grupo grandi di Jamaiquino bibando na Aruba pa hopi aña pero nunca a haci algo pa celebra e fiesta di independencia di Jamaica.Pa algun aña caba ta trata di conecta e cultura di Jamaica cu e nacion di Aruba, pa demostra cu nan ta hendenan alegre, harmonioso pero trankil, y cu nan kier wordo inclui den e cultura di e isla aki.
Mas ainda pasobra tin hopi similaridad. Por ehempel mescos cu Aruba, e hendenan di Jamaica ta gusta cuminda stoba y tambe cu curry. E platonan ta diferente, e diferencia ta den e “seasoning”.Nan ta masha agradecido cu e pueblo di Aruba a habri porta pa ricibi e prome Jamaiquinonan cu a yega Aruba y esey ta algo cu e actual generacion semper lo keda agradecido na dje.
E celebracion di diasabra a cuminsa for di mainta y a sigui te mey anochi cu hendenan disfrutando di platonan y musica Jamaiquino.
PAIS HOBEN
Diamars dia 6 di augustus, Jamaica ta celebra 57 aña di nan independencia for di Inglatera. E celebracion ta un dia nacional, considera e Dia di Independencia di Jamaica.
Christopher Columbus a descubri Jamaica na aña 1494 y a yam’e “Crown of Castille”. E imperio Spaño a cuminsa goberna e isla na 1509, bao mando di e conkistado Juan de Esquivel. E Spañonan a sclavisa e nativonan y ora no tabata suficiente, a importa Africanonan pa traha como esclavo.
Despues di 146 aña bou mando Spaño, ata e Inglesnan a tuma e isla over dia 11 di mei 1655.
Riba 19 di juli 1962, Parlamento di Inglatera a aproba e independencia di Jamaica entrante 6 di augustus 1962, aunke a conserva e Reina di Inglatera como Hefe di Estado.
Mester menciona cu e asunto di independencia di Jamaica conoce opinionnan mixto bou di su propio ciudadanonan. Un encuesta teni na aña 2011 a saca afo cu 60% di e Jamaiquinonan ta pensa cu e pais lo tabata miho awe si nan a keda bou mando Ingles.
