Recientemente e Ginecologo Babet Latour a tuma su retiro for di Hospital. Esaki a trece hopi reaccion den mundo di medicina. Por a lesa riba Facebook comentario hopi pisa di e Anestesiologo Israel (Ike) Posner. Su critica tabata dirigi hopi riba e director di dr. Horacio Oduber Hospital pasobra e lo ta haci bida di e specialistanan imposibel.
Jacco Vroegop, presidente di Hunta di Directiva di Horacio Oduber Hospital, ta nenga di a haci bida di specialista Latour imposibel te cu e mester a bay. Tampoco ta berdad cu a retira e specialista aki. Mas bien el a tuma e decision pa bay. “E cualificacion di dokter Posner, cu e ta un regalo di Dios, mi ta lag’e p’e.”
Vroegop a bisa si cu ta hopi fastioso pa su persona como ex-doño di trabou duna comentario riba un ex-trahado. Ta keda na cada ken pa tuma e decision cu e ta kere cu ta cumbini’e.
Semper, el a bisa, el a pensa cu Latour ta un bon Ginecologo “y mi ta lamenta cu el a dicidi di bandona nos. Mayoria di hende tin guia riba nan propio bida pa scoge si ta nan ta bin aki of nan ta bay.”
E ta consciente tambe cu comunidad ta haya hopi fastioso cu specialistanan ta bay y cada biaha ta haya nan confronta cu un otro reemplasante. E por bisa tambe cu a tuma diferente specialista nobo y por sigura cu pa inicio di otro aña ta traha cu un team fiho completo. “Ta importante pa e pashent cu cada biaha e ta mira e mesun cara di e specialista cu ta atende su caso. E ta crea un confiansa pa e pashent di e specialista cu ta atende cu ne.”
E no por bay den detaye di loke ta pasa entre un trahado y su doño di trabou. “Pero mi por sigura cu nos tur ta mira den e mesun direccion.”
Vroegop ta hopi contento di desaroyo di ultimo añanan unda cu a logra cu tin un hospital saludabel financieramente, a inverti den educacion, den un maneho sostenibel. Ta brinda atencion den mas specialismo cu ta evita cu ta manda menos hende den exterior. A cera diferente acuerdo di colaboracion pa mehora e calidad, den cual a inverti tambe, yegando na diferente protocol.
“No por evita,” el a bisa, cu tin hendenan cu kier haci cambio den nan bida. “Mi ta haya importante si cu nos ta traha tur dia manera un solo team, trahando hunto unda cada un tin no solamente derecho pero tambe obligacionnan. Si mi ta lamenta tin biaha loke hendenan ta grita eyfo, pero dificilmente mi por defende mi mes pasobra ta trata di contractonan individual. Pero e hospital cu nos tin awo, tur hende por ta orguyoso di dje. Mi por sigura cu tin bon hendenan trahando aki. Apesar di tur critica, mi ta sigui bringa pa Aruba. Y mi ta orguyoso di loke hospital ta haci.”
