Pago di gelijkbedrag na pensionadonan ta un dolor di cabes di e grupo aki pa hopi aña caba. Organisacion Pensionadonan Publico di Aruba (OPPA) un biaha ta haci apelacion na gobierno pa haci e pago aki pa caba na e grupo vulnerabel aki, pasobra nan mes di e placa awo cu tur cos a bira caro.
Ivo Valdes, e presidente di OPPA, a conta cu ta hopi carta a manda pa Gobierno. For di 2018 a bin ta pidi atencion pa e tema aki. Na 2018 parlamentarionan a entrega un mocion cu ta bisa cu e forma cu e gobierno a atende cu e tema aki, nenga gelijkbedrag y bashipremie na esnan cu a baha cu pensioen prome cu 2015, no ta corecto.
Den e mocion a dicidi pa pidi gobierno pa revoca e decision menciona y urgi gobierno pone e fondo disponibel pa nan haya e bashipremie y gelijkbedrag desde prome di januari, 2016. Nunca gobierno a cumpli cu e mocion di 2018, Valdez a conta.
Tambe el a conta cu e por a lesa diferente caminda riba Facebook unda ta menciona cu su persona a firma un protocol pa bay di acuerdo cu e bashipremie y gelijkbedrag no ta wordo paga desde prome di januari, 2015. “Na Aruba nos ta un pais democratico y hendenan ignorante tambe tin derecho pa biba aki riba. Si bo sa y tin e protocol cu mi a firma, presente publicamente. Ta imposibel cu ami cu no ta forma parti mas di sindicato desde 2011, door cu mi a bira pensionado na 2013, y e drenta directiva di OPPA na 2014. Con ami por a forma parti di e reunionnan unda cu a bini e cambionan, cu mester ta den acuerdo bilateral. Ami no tin arte ni parte den e asunto di pensionadonan cu no ta ricibi bashipremie ni gelijkbedrag. Mi no sa di unda e hendenan ta saca e cos ey.”
Valdes tabata hopi disgusta cu e expresionnan haci contra dje.
El a recorda cu na 2020 gobierno a corta di forma ilegal den e gelijkbedrag. A reacciona cu carta di cual e ultimo tabata fecha 7 di november, 2023. Anteriormente a haya informacion cu e situacion di gobierno no ta duna pa paga bek. E reaccion aki e no ta compronde pasobra recientemente a papia cu tin un surplus. Ademas, si ta bay di acuerdo pa paga extra interes, di con no ta paga e debe cu tin cu pensionadonan.
E ta wordo acerca hopi biaha door di pensionadonan cu pregunta si ta haya e pago bek of con. P’esey e ta haci apelacion na gobierno pa paga e 3 mil florin di 2020 / 2021 na pensionadonan. “Costo di bida ta halto, e situacion di pensionado no ta manera antes. Nan tambe ta pasa den necesidad. Un hende den necesidad ta busca ayudo. Mi no por yuda nan pero si mi por ta nan bos den reclamo pa haya pago bek.”
