Riba iniciativa di e Asociacion di Turismo y Hospitalidad di Corsou (CHATA), a tuma luga un reunion siman pasa riba huurmento di ‘vakantiehuis’ ilegal.
Durante e reunion tabat’ey presente e representante di e industria di turismo y HORECA, minister di finansa y e representantenan di Stichting Belastingaccountanstbureau (SBAB), Curaçao Tourism Board (CTB) y e sector di asunto fiscal. Durante di e reunion aki a discuti e problemanan existente encuanto huurmento di vakantiehuis ilegal na Corsou.
Esaki ta afecta tanto persona particular como organisacion cu ta huur vivienda y/of alohamento vacacional sin paga e impuesto necesario. CHATA a compila un lista di nomber di e personanan y e organisacionnan cu conoce e industria aki. SBAB lo uza e lista aki como base pa detecta y monitor huurmento ilegal, cu un enfoke riba e responsabilidadnan fiscal. Tambe a realisa un estudio di e diferente alohamentonan turistico cu e fin di ofrece un imagen cla di e situacion actual di e mercado. Esaki ta inclui persona particular cu ta huur nan cas, hotel, establecimento di HORECA, empresanan di huur auto, scol di buceo, etc.
Minister Silvania kier caba cu e posicion bentahoso di mercado cu actualmente ta evita paga impuesto. E contribuyente honesto den algun momento ya no por competi den e mercado, cu tur e consecuencianan cu esaki ta bin cu ne. Dentro di tres luna, SBAB lo representa e resultadonan di e investigacion y e auditoria n’e Minister y lo programa un reunion cu e partinan interesa a discuti e resultadonan. E resultadonan lo ta publica den cuadro di transparencia.
