Departamento di Salud Publico (DVG) recientemente a tuma nota di un aviso publico unda ta ofrece benta di vacuna contra COVID-19 na Aruba. DVG ta manda un alerta na comunidad pa NO cay den e trampa aki. E practica aki ta un peliger grandi pa bo salud y tambe lo conduci na perdida di bo placa.
Departamento di Salud Publico ya caba a tuma contacto cu IVA Inspectie Volksgezondjeid Aruba riba e practica peligroso aki. Tambe a pone e otro departamentonan concerni na altura pa pone un stop inmediatamente na e situacion prome cu cualkier ciudadano keda perhudica.
Manera DVG a splica na varios ocasion ta pone tur vacuna na un cierto temperatura continuamente pa garantisa su eficiencia. Cumprando un vacuna for di ken cu ta of unda cu ta no ta garantisa bo e siguridad tampoco e efectividad di e vacuna. Cumprando un vacuna falso of manipula, un vacuna cu no ta trata segun protocol pa e no perde efectividad, no ta garantisa bo e siguridad tampoco e efectividad di e vacuna.
E practica peligroso aki ta conoci caba na otro pais unda tin scarsedad di e vacuna. E practica aki ta encera cu ta horta ampul di e vacuna of ta busca e ampulnan uza y ta pone e resto di e vacuna cu ta haya den e ampulnan hunto den un otro ampul. Of ta yena awa of cualkier otro likido den e ampulnan y ta bende pa vacuna. Esunnan cu ta haci e acto aki ta hacie unicamente pa gana placa y no ta importa salud di e victima cu nan ta gaña.
