E investigacion den e caso Avestruz ta continua y awe un biaha mas por a nota entrada di Franklin Abath drenta den oficina di Landsrecherche y a sali bek despues di algun ora. Manera cu tur hende sa, Abath tabata ex-hefe di DIP y ta sospecha pa di ta envolvi den e caso ya menciona relaciona cu otorgamento di terenonan den gobierno.
Loke tambe por a tuma nota ta varios persona cu documentonan den man, entre otro envelopnan di impuesto. Fuera di Abath, Leoncita Arends (kende ya caba ta cera na KIA pa 60 dia mas) tambe ta deteni den cuadro di e mesun caso tambe, hunto cu Freddy Every y Pieter Susebeek, deteni dia 7 di mei ultimo riba ordo di hues comisario. Famianan di e ultimo tabata para pafo di e oficina di Landsrecherche pa asina pone nan mes na altura como tambe wak si nan por sikiera mira nan ser stima. Anteriormente tabatin otro detencion di entre otro Rebecca Richardson, Jeff Franken, Gaby Werleman y tambe Ninosca Nuñez, kendenan ya ta den libertad.
E CASO AVESTRUZ
Ministerio Publico a informa dia 2 di october 2019, dia cu a haci e entradanan hudicial, cu Landsrecherche hunto cu hues-comisario y den cooperacion cu Cuerpo Policial di Aruba, a tene entrada hudicial na diferente luga. E entradanan aki a tuma luga den cuadro di un investigacion penal di Landsrecherche pa posibel delitonan di corupcion y otro echonan castigabel posiblemente cometi relaciona cu otorgamento di terenonan di gobierno. Mas concretamente: E investigacion ta dirigi riba e pregunta si un of mas compania a obtene a base robes (un opcion riba) derechonan di erfpacht di terenonan di pais Aruba den e añanan 2009 te 2017. Ademas ta investiga e rol di ex-minister Benny Sevinger den esaki.
