Sigur e cantidad di personal lo tin cu wordo amplia. Ta spera cu riba departamento di Radioterapia, tin cu busca a lo menos un specialista medico Radiotherapeutisch oncoloog.
Segun director di Imsan, dr. Joel Rajnherc, ta bezig cu solicitacion pa esey caba. Tin mester di hende cu ta tecnico di laboratorio pa oncologia di radiacion. Esey tambe ta dos pa tres hende. Enfermera tambe. Riba sala di operacion lo bay opera cu anaesteciologonan local, cu specialistanan medico local. Kiermen en totalidad ta spera cu durante curo di e aña aki, vooral 2019, tin cupo pa aproximadamente 50 persona extra den servicio di ImSan pa e temporada cu lo bay bin.
Ta bezig poniendo e programa di esey riba papel, hunto cu partnernan di Baptist Health. Ta casi sigur cu tin cu atrae hende di afo pa bin, pasobra e mercado local ya ta satura. Pero claro cu hende y empleado local tambe tin e posibilidad di solicita. Tey primariamente pa nos hendenan local. Pero e mercado ta hopi chikito, segun dr. Rajnherc.
Entrada
Di un manera of otro Imsan ta genera su entrada. E trabao cu lo bay wordo genera, esta e 50 personanan cu Imsan tin pensa di tuma den servicio, no ta cheaplabor. Segun dr. Rajnherc, e luga un centro medico grandi, di servicio cu ta tuma luga den day care. Esta di mainta te cu bahada di solo, bo por wordo trata. Imsan no lo bay tin pasamento di anochi. Ora papia di 50 persona, ta di un indole administrativo, mas hende di siguridad, ta papiando di mas hende pa limpiesa. Tur eseynan ta inclui. No ta solamente funcionnan halto. Tur e funcionnan cu e expansion aki ta bin cun’e.
Ora papia di inversionnan asina, tin cu corda cu tin cu salba basta finansas cu no ta bay afo, cu ta bay keda aki na Aruba. Esey tambe ta un compensacion. No mester lubida tampoco, no ta solamente e afo cu ta bay afo, tambe ta su guia, cu ta bay afo, cu ta un gasto directo di AZV. Pero tambe otro miembronan di famia ta sali bay afo, bay bishita e pashent. Tur esey ta perdida di placa, dividendo cu ta bay afo. Eseynan tame mester calcula den e programa aki. Tambe, por fin San Nicolas lo bay haya un centro, unda nan por haya mas cuido avansa y no pa tur cos nan tin cu bay na e otro parti di e isla. E Health Care Benefit ta wordo miho distribui riba henter nos isla.
Palabracion
Tur esaki a bay segun palabracion y acuerdo cu AZV, segun e director. Den esaki tambe, semper departamento di Salubridad Publico y minister di Salubridad Publico tin su decisionnan y tin un voz. Tur esaki a wordo palabra caba di antemano y atrobe nan a wordo rectifica door di e minister nobo di Salubridad Publico, segun dr. Rajnherc.
E meta principal di Imsan
Semper Imsan ta duna posibilidad pa negoshi habri, pero e funcion primario di Imsan, ta pa duna cuido na pueblo di Aruba. E comunidad Arubano, e pashentnan, e clientenan, cu ta sigura via AZV. Esey ta e meta principal, segun dr. Rajnherc. Si tin luga, si tin oportunidad pa genera un tercer manera pa haya placa, claro cu Imsan ta habri pa esey. Esey ta algo cu ta hopi importante, pasobra e ta yuda baha e gastonan cu nos comunidad tin cu paga pa servicio. Si haya un di tres fuente di ingreso, turismo medico, esey por yuda cu un parti di e placa cu cuido medico di Aruba ta costa, ta wordo paga door di hendenan di afo. Esey ta algo cu tin e vision pa hopi tempo caba. Radio terapia ta duna e oportunidad di atrae pashentnan di afo. Tin contacto cu Boneiro, tin contacto cu St. Maarten y tin cu bay wak den futuro wak con esey ta bay, si por haya pashent. E relacion cu tin cu Baptist, ta sigura di duna e miho calidad posibel di tratamento y segun Rajnherc, esey lo bay ta hopi atractivo pa hopi otro isla den Caribe, pa nan manda nan pashentnan na Aruba. Sigur si tin un JCI Accreditation, cual ta mustra cu nos ta traha riba un nivel masha halto di calidad di servicio, e director a finalisa.
