Entre e informacion cu Servicio di Impuesto a ofrece diahuebs mainta tocante e ley nobo pa Plan di Impuesto 2023, a toca e punto di servicio online entre un proveedor den exterior y un consumidor na Aruba y viceversa.
Director di DIMP, mr. Luenne Gomez-Pietersz a duna un splicacion for di cual a resalta cu e cobramento di BBO/BAVP/BAZV riba esaki lo sosode solamente ora ta trata di un transaccion entre negoshi y negoshi (B2B).
E cambio ta bin tras e ampliacion di e definicion di servicio den ley, cu awo ta inclui servicionan electronico, bou di cual ta cay telecomunicacion, radio y television, entre otro. Esaki ta pone cu esunnan cu prome no tabata cobra of paga impuesto riba servicio cu taimporta, awo si lo mester paga BBO/BAVP/BAZV.
“Alabes ta amplia e reglanan pa cu e sitio unda ta duna servicio pa asina por determina cua compania tin e obligacion di paga BBO/BAVP/BAZV ora ta trata transaccion entre companianan,” asina mr. Gomez-Pietersz a indica.
Cu servicio electrónico ta referi na, por ehempel, servicionan online di accounting, stockphoto, video, audio, website, skirbimento di documento, acceso na plataforma di data, download of mira pelicula online, download of scucha musica online.
E excepcion ta intercambio di informacion y conseho, por ehempel, via email, como tambe mercancia manera paña y sapato cu ta cumpra online.
E director di DIMP a duna di conoce cu tur e informacion aki contribuyente por haya riba website y Facebook page pa tur hende lesa den tur trankilidad.
