Imelda Kleuterschool ta bay organisa un caminata. Meta di e caminata aki ta pa recauda fondo pa asina nan por cumpra material pa duna les digital n’e alumnonan.
Lisi Werleman, cabesante, a expresa cu nan ta organisa e Caminata Sint & Piet. E caminata aki ta pa famia caminda Sinterklaas y Piet lo ta presente. E caminata ta tuma luga dia 4 di december proximo. Meta di e caminata aki ta pa pasa un rato dushi cu famia pero tambe pa cumpra laptop p’e juffrouwnan por traha nan lesnan y hacie mas atractivo p’e muchanan.
Finelaine Tromp, maestro, a indica cu e caminata ta tuma luga dia 4 di december y ta cuminsa cu registracion pa 5:30 pm dilanti Eagle Beach, esta Coco Loco. E caminata ta bay te mas o menos Butterfly Farm y regresa na Coco Loco. E distancia ta mas o menos cinco kilometer y e ticketnan ta costa dies florin. E ticketnan ta obtenibel cerca e muchanan di Imelda Kleuterschool mes.
Stacey Croes, maestro, a indica cu e caminata aki lo ta uno hopi leuk p’e muchanan, pero tambe p’e mayornan y Aruba henter. Riba e dia aki tur mucha por presenta bisti cu nan pechi di Piet, pechi di Sint, bisti completo of cu e pechi so. Tambe nan por pinta nan cara di color. Lo bay tin diferente premio, pa e grupo mas anima y asina ey.
E dia aki lo ta uno agradabel. Tambe tanto Sint como hopi Piet lo acompaña tur hende riba e ruta.
Pa mas lesa TREMPAN.COM.
