Un accion relampago di oficialnan di Warda Nos Costa, a conduci na detencion hopi lihe di un ilegal cu a trata na huy.
Dialuna den careda di 3’or di atardi un persona di habla Spaño cu tabata permanece ilegal na Aruba, a trata na scapa for di mannan di oficialnan di Warda Nos Costa. E homber a subi na careda riba e parkinglot di Pricesmart, mientras e tabata wordo sigui na pia y den auto pa algun oficial di Warda Nos Costa.
Na altura di e parking lot di Flora Market, e oficialnan di Warda Nos Costa a logra detene y hib’e na e Base di Warda Nos Costa pariba di Brandweer na Sabana Berde. Hefe di Warda Nos Costa tambe a sali pa yuda su coleganan y tabata na e sitio.
