Stichting Hunga Teca ta un organisacion encarga pa fia wega y co’i hunga na mucha. Pa Hunga Teca e ta importante pa mucha por ‘have fun’ y desaroya su mes. Diaranson mainta tabatin actividad pa un grupo di mucha na YMCA San Nicolas.
Yamilla Hoevertz-Kock, presidente di e stichting, a conta cu Hunga Teca ta un fundacion caminda un mucha por bira miembro pagando solamente 5 florin pa aña.
Cu e miembresia aki, e mucha por fia co’i hunga y tur siman por cambi’e y busca otro. Hunga Teca ta concentra riba co’i hunga educativo pa motibo cu un mucha por siña hopi na momento cu e ta hunga.
Ademas di siña hopi, e mucha ta desaroya su parti motorico grof ora e ta core y bula rond. Or cu e mucha ta hunga lego e ta desaroya su parti motorico fini, su creatividad y tambe e lo tin un desaroyo intelectual. Hungando hunto e mucha lo tin desaroyo social. Pues Hunga Teca ta enfoca riba hunga y siña cu wega.
Diaranson tabatin luga pa 20 mucha pero 25 a presenta pa hunga y manera Hoevertz mes a bisa “nos no por nenga un mucha di hunga” pues a acepta e resto di mucha. Hunga Teca ta di pensamento cu mas un mucha hunga mas e ta desaroya su mes.
Diasabra awo lo tin un tayer di pinta riba canva pa mucha di 4 pa 12 aña. E actividad di pintamento lo cuminsa 10:00 am y lo termina 11:30 m. Hunga Teca ta pidi pa laga e mucha bin cu paña cu por haya verf riba dje.
