Segun Humphrey Tromp di APA, mirando e retonan cu APA lo bay tin dilanti, ta importante pa gerencia consisti di hendenan capas y por sigui maneha. Den e ultimo añanan cu Tromp a traha cu Jossy, a cera un bon team. Su conocemento riba e parti di tereno, etc., ta hopi grandi y importante pa sa pa decisionnan corecto wordo tuma pa e desaroyo di e tereno na Oranjestad, cu ta liber.
E ta sumamente importante pasobra ta un biaha bo ta haya chens pa haci’e bon. Una bes cu cierto decisionnan wordo tuma cu no ta corecto, no por corigi’e. E ta hopi importante y ta un proyecto cu lo bay dura largo. No ta un proyecto cu den algun aña e lo ta cla.
Tin cu stipula si kico tur lo bay tuma luga pa e por tuma luga despues di 10 pa 15 aña cu ora bo pasa, ta contento cu e resultado.
Tromp ta contento di e decision cu a tende cu a prolonga su contrato pa 3 luna.
Na momento cu e vacatura pa director a sali, Tromp a solicita. El a bay su entrevistanan. Y despues cu e seleccion a wordo haci, Tromp a compronde cu e proceso tin un retraso den dje.
E retraso mientras tanto tabata te cu dia 31 di December, y te ainda no a ricibi ningun notificacion. Unico cos cu nan a ricibi ta, cu nan ta prolonga su contracto.
Si Tromp wordo selecta pa haci e trabao sigur. Den e ultimo 13 añanan, el a traha hopi di cerca cu ex director Alfonso Boekhoudt, kende actualmente ta gobernador. Y despues den e ultimo cinco añanan a traha cu Figaroa. Tromp ta cla p’e y ta keda na e decision pa wordo tuma.
E mesun bon aña
Tin reservacionnan cu ta wordo ricibi di por lo menos dos aña delanta. Tin actualmente peticionnan pa 2019 y 2020. 2019 ta mustra mesun bon aña. E mundo di turismo crucero ta dificil pa bisa cu cada biaha tin cu bay sigui crece. Si nos surpasa e 750 pa 775 mil otro aña, a logra y ta contento cu esey. Bo no por keda crece, pasobra tin hopi otro tereno cu tambe mester crece cubo. Kisas e puerto por acomoda e barconan ey, pero bo tin cu duna nan e bon experiencia y cu bo tin cu duna nan tambe cada biaha cos nobo.
Tin hopi trabao pa haci cu e otro stakeholdernan, manera e Toursnan cu ta wordo brinda, e calidad di toursnan mester keda eleva y cada biaha bin cu cos nobo.
Esey ta importante pa por sigui crece. A base di e reservacionnan cu tin actualmente, segun Tromp lo yega e mesun cantidad cu kisas por surpas’e, of keda net abao. Pero sigur lo yega hopi cerca di loke a logra den 2018.
