Hues mr. T. Tijhuis a dicta fayo ayera den e caso cu Lex de Jong a entama contra Fundacion Salud Mental Aruba (RESPALDO). E magistrado a elimina e retiro di e ex-director di e fundacion y a ordena e directiva pa sigui paga salario di e director for di dia cu nan a kit’e, te awe y te dia cu kibra e acuerdo di trabou na un forma legal. E fundacion no a keda contento cu e decision di corte y a dicidi mesora di apela e sentencia, pero asina mes mester sigui paga su salario te ora cu tres hues dicta diferente den Corte di Apelacion.
Bataya legal den corte
Lex de Jong, siendo ex-director di RESPALDO a conta cu sosten legal di abogado mr. Richie Kock. Di otro banda, e hunta di supervision di RESPALDO a dicidi di busca asesoria legal di abogado mr. David Kock, un experto riba leynan laboral. Asina mes, e ultimo aki no a logra convence hues di su punto di bista y como tal a perde e caso aki.
Kico ta e caso
E caso den corte tabata debi cu Fundacion RESPALDO a kita su director financiero for di trabou. Lex de Jong di 49 aña di edad, tabatin un acuedo di trabou individual (Individuele Arbeidsovereenkomst) firma cu e fundacion desde dia 1 di februari 2018. Prome cu tur cos mester contesta e pregunta cu si como director of Presidente di Raad van Bestuur, cu si Lex de Jong ta gosa di e proteccion di e asina yama “preventieve ontslagtoets” y si por elimina e decision di e Hunta di Supervision. En general, e hues ta bisa, cu no tin excepcion pa directornan di compania of fundacion relaciona cu e “algemene opzegverbod”.
Mocion di desconfiansa
Desde aña 2019 caba a presenta problema den gerencia, di cual e dos directornan no por a traha bon mas cu otro. Na september y na december 2021 e personal medico di e fundacion a firma un mocion di desconfiansa contra e director di operacion y financiero, Lex de Jong. Nan ta bisa cu su maneho no ta sirbi y cu nan no ta dispuesto pa sigui traha eynan tanten cu e t’ey. E tempo ey e Hunta di Supervision a papia cu ne riba e asunto y a acorda cu e lo sigui un trayecto di mehoracion pa haya e trahadonan bek na su banda.
A kit’e memey di su vakantie
Durante un reunion cu e Hunta di Supervision dia 28 di juli 2022, a anuncia na Lex de Jong cu nan ta pensando pa kit’e for di trabou. Dia 12 di augustus 2022, durante su vakantie cu a cuminsa dia 29 di juli 2022, Lex de Jong a ricibi un email for di e Hunta di Supervision, den cual ta inform’e cu despues di su vakantie, cu e no mester presenta mas na trabou. Na mes momento a blokia su password pa drenta den e sistema di trabou. A sigui varios deliberacion, varios reunion den cual De Jong a purba defende su maneho y purba convence e Hunta di Supervision cu el a drecha hopi y cu no tin base pa kit’e, pero tur intento a resulta envano. Dia 31 di augustus 2022 RESPALDO a manda Lex de Jong su carta di retiro, cu a drenta na vigor dia 28 di februari 2023, pues seis luna despues. Den e carta a skirbi cu por lo menos cinco grupo, esta Hunta di Supervision, AZV, Hospital, Minister Dangui Oduber y personal di RESPALDO, no por traha cu ne mas pa motibo di un of otro incidente, pa cual no tin confiansa mas den su capacidad como director pa maneha e fundacion. A pag’e cuater luna di salario completo y e dos ultimo lunanan a pag’e mita salario.
RESPALDO ta paga bon
Lex de Jong tabata conta cu un bon salario como director financiero y alabes presidente di e Raad van Bestuur di RESPALDO. E tabata cobra Afl. 20.912,78 pa luna y riba dje tabata cobra Afl. 650 pa luna na “vergoeding” y ainda ta cobra vakantiegeld.
Demanda di Lex de Jong
Locual Lex de Jong a demanda den corte tabata pa hues declara cu RESPALDO mester a pidi permiso na director di Directie Arbeid pa por kit’e fo’i trabou. Como tal, door ci RESPALDO no a haci esey, pa declara e retiro como nulo y obliga e fundacion pa sigui paga su salario te ora cu yega na un areglo husto cu ne. Tambe pa obliga RESPALDO pa, separa di paga su salario regular, pa riba dje pag’e tambe un “vertragingsrente”. Mester menciona cu abogado di RESPALDO a purba desbarata tur su ponencianan y a pidi hues pa rechasa e demanda y sentencia de Jong p’e cubri e gastonan di corte tambe.
Kico hues a husga
Corte a revisa e contract entre Lex de Jong y RESPALDO bon y a constata cu e fundacion mes a faya ey. Pasobra, den e contracto individual cu De Jong, ta yam’e un “werknemer”, un director y despues miembro di Raad van Bestuur. Door di e catalog’e “werknemer”, e ta conta cu proteccion di retiro. Pesey, ora a kibra e relacion di trabou cu ne como director y manehado di e fundacion, no a tene cuenta cu e aspecto di “werknemer”. Riba dje, corte ta subraya cu den e caso aki, mester aplica e Landsverordening Beëindiging Arbeidsovereenkomsten (LBA). RESPALDO a purba convence hues cu nan ta aplica mesun maneho cu gobierno, pero e magistrado a para riba cu esey no por. E echo cu ta Minister di Salud y director di AZV a funda RESPALDO no ta hacie un instancia di gobierno, pues e ta keda un fundacion priva cu mester tene nan mes na leynan laboral. Como tal, hues a hala atencion di RESPALDO cu nan mester a pidi permiso di director di DAO pa kita Lex de Jong for di trabou y door di no a haci esey, henter e retiro ta bira nulo.
Decision di corte
hues , despues di a analisa e contract y tur e cartanan y despues di a scucha e demanda di Lex de Jong y e defende di RESPALDO, a duna Lex de Jong rason. Como tal a bay di acuerdo cu mayoria di su demanda. Como tal a destrui e retiro di e director di RESPALDO, a ordena pa pag’e su salario completo, pues e di cinco y seis luna na 100% tambe y for di ey pag’e interes pa motibo cu ta laat den pago di salario, te cu mas o menos 15% riba su salario regular. A condena RESPALDO na paga e gastonan di abogacia na banda di Lex de Jong, balora na Afl. 2550.00.
Hunta di Supervision a faya
E Hunta di Supervision di Fundacion Respaldo no a haya rason den nan decision pa kita e director for di trabou, siendo cu vakantie. Aunke tin hasta abogado den e hunta aki, hues a bari nan ponencia for di mesa y a dicta na fabor di e director, cu awor tin basta luna di salario pa haya paga bek y cu interes! E Hunta di Supervision di RESPALDO ta conta cu miembronan manera Glenn Farro como presidente, abogado Caroline Hart, Reinier van Sisseren, Ronella Croes y Rosanna van Dijk. Nan ta esunnan responsabel pa maneho di e directornan di e fundacion y ta esunnan cu ta “hire and fire” si ta necesario. Den e caso aki, nan a faya den nan decision di “fire” e director aki asina sin mas!
Tocante Lex de Jong
Na 2017, Lex de Jong a kita como director medico di AZV y a cera un contract di trabou cu Fundacion Salud Mental Aruba Respaldo pa eherce e funcion di director di operacion. Desde 1 di augustus di e mesun aña e ta forma parti di e Hunta Directiva hunto cu e Director Medico. Prome cu esey, de Jong su posicion na AZV tabata como Chief Medical Officer, funcion cu el a eherce desde 2012. Eynan e tabata responsabel pa polisa di cuido medico, control di calidad y di manda pashent pa exterior.
Su estudio ta den Medicine and Health Care Policy & Management na Erasmus University na Rotterdam, a yega di core stage na Brazil y tin experiencia profesional den mundo di seguro medico y cu dunadonan di cuido. A traha na GGZ Nederland den e desaroyo di e sistema DRG. Prome cu bin Aruba a cera un acuerdo di varios aña entre gobierno, seguronan y dunadonan di cuido pa stabilisa e crecemento financiero y di calidad. Na mesun momento, van Jong tabata presidente di e Hunta di Supervision di Van Tromp Foundation, un fundacion di caridad enfoca riba educacion medico den e ciudad di Rotterdam.
Tocante RESPALDO
A funda Fundacion Respaldo na aña 2017 den cooperacion cu AZV, Hospital y e vakgroep di psikiatranan pa atende cu e problematica di salud mental na Aruba. Na Januari 2018, Respaldo a asumi e actividadnan cu PAAZ di Hospital tabata realisa hunto cu e edificio y personal. Conhuntamente cu ‘Balance’, e policlinica di psikiatranan independiente di Aruba, a inicia e trabounan cu e obhetivo di mehora e calidad di cuido di salud mental. For di 2018 te cu 2022 por constata adelantonan y con hopi ta papia den comunidad riba salud mental y con hopi conscientisacion a crea.
Fundacion Respaldo a cuminsa cu 50 empleado y aworaki tin rond di 100 empleado cu ta trahando pa salud mental na Aruba. Ta implementa mas y mas calidad den e mehoracion di loke ta e trato cu nan ta duna, teniendo na cuenta e standardnan internacional. Respaldo ta atende rond di 3 mil cliente riba un base anual. E policlinica ta atende muchanan rond di 4 aña te na hende cu edad mas halto. Tin dos policlinica disponibel, un pa adulto cu 40 cama disponibel y un pa mucha y hobennan.
Loading…
Reload document
Open in new tab 
