Recientemente Aruba Food and Beverage Association (AFBA) a anuncia cu a cuminsa reduci servicio den horeca debi na falta di personal. Por lo menos esey Miriam Dabian di AFBA a indica na 24ora.com. AFBA ta na fabor pa importa personal for di exterior mirando cu na Aruba mes no ta hayando. A reuni cu Minister di Integracion, SVb, DIMAS y DPL.
Nan tin oido pero nan ta tarda mucho. A papia masha bunita rib’e plan pa importa personal di exterior pero te ainda nada. Horeca ta desespera pa trahado, nan tin cu percura tur dia pa brinda un servicio di calidad. Mester tin un menu amplio pa brinda n’esunnan cu ta paga un cantidad di placa pa bin bishita nos isla.
E situacion ta alarmante, pa sigui brinda e servicio ya a cuminsa reduci orario, reduci cantidad di cuminda riba menu y esey tin un resultado negativo pa nos pais. Turista ta paga cantidad di placa y no ta ricibi un servicio optimal, ningun hende ta desea esey.
Di otro banda ta mira progreso, e infrastructura t’ey, e desaroyo t’ey pero e personal falta. Locual ta boga p’e ta pa esunnan cu t’ey caba riba nos isla, ricibi un permiso den man p’asina sigura cu por sigui brinda servicio n’e clientenan. Si gobierno sigui tarda, cos lo bira pio.
