Siman pasa, 9 te cu 14 di october, a tuma luga e competencia di Baseball in Paradise, unda cu tabatin mas di 60 wega entre e categorianan U12, U14, U16 y U19. A conta cu participacion di 45 team.
Shurty Tremus, organisado di Baseball in Paradise, a indica cu e siman a bay bon cu bon clima. Na tur stadion di Aruba tabatin wega y aki por a mira hopi talento, tur a competi contra otro. Tur e muchanan a hunga hopi bon.
Tremus a indica cu a bin mucha di Mexico, Hulanda, tin mucha di Santo Domingo cu a join cu esunnan di Aruba, incluso tabatin mucha di Corsou y Boneiro. For di e academia di Tremus, cu ta di Hulanda, a bin 400 hende, di cual 106 tabata hungado. Mexico y Corsou a bin cu grupo grandi, p’esey Tremus ta kere cu a surpasa dos mil hende cu a bin p’e Baseball in Paradise.
Pa por a yega final di diasabra, di cada categoria e dos miho cu a clasifica di poule tabata avansa, unda tabatin e round robin. Di aki e dos miho teamnan a hunga e final.
Tabatin coach cu no tabata contento cu algun cos, pero, segun Tremus, nan a sinta na mesa cu e coachnan prome cu e torneo. No tur ora tur coach tabata presente y a perde algun cos. Na momento cu e campeonato a inicia, nan no tabata sa di e palabracionnan haci.
Esaki tabata di tres biaha cu a organisa e Baseball in Paradise. A organis’e pa prome bes na 2021, pero a tene aña pasa y e aña aki. Segun Tremus, pa selecta kendenan lo participa den Baseball in Paradise, na Hulanda nan a tene try-out. A conta cu participacion di 250 hungado, unda a saca shete team.
Aruba a traha seleccion door di scoge hungado di diferente team pa por a participa den e torneo aki. E veldnan uza tabata Winston, Pos Chikito, Tanki Leendert, Duracell y Joe Laveist. A uza shete veld pa por a organisa e torneo aki.
