Den nomber di Fundacion Pro Cultura Aruba nos ta extende un invitacion cordial pa loke lo bira un anochi di homenahe na nos gran baluarte cultural Sr. Gabriel Alejandro ‘Ale’ Werleman.
E aña aki Ale lo cumpli 65 aña tocando su propio caha di orgel. Den comienso di añanan 1900 e prome caha di orgel a yega Aruba y asina cuminsa forma parti di nos herencia cultural.
E caha aki a yega Aruba 14 di juni 1906 y tabata tin como nomber ‘Para Complacer’. E prome doño tabata Sr. Chan Quandt, d.f.m.. Despues di añanan e caha aki a pasa pa Sr. Chico Koolman, d.f.m., kende a cumpra e caha y como doño a pone su nomber pa e caha di orgel aki pa ‘El Negrito Maldito’. Sr. Chico Koolman ta tata di ex-gobernador, sr. Olindo Koolman.
E di tres doño di e caha a bira Chonpin Geerman, ex-taxista # 96. Asina despues e di cuater doño di Caha di Orgel a bira nos baluarte Gabriel ‘Ale’ Werleman. Kende a cumpra esaki 31 di october 1954 y cu te awe ta doño di ‘El Negrito Maldito’ pa 65 aña caba.
Pero e caha aki ta un poco parandero. El a bay Hulanda abordo di e barco ‘Oranje Nassau’ y a keda 3 aña na Hulanda. Pero a keiro pa Alemania, Spaña y a bay Italia tambe. Despues e Caha di Orgel aki a bini bek y sigui keiro pa Boneiro, Corsou, Maracaibo Venezuela. Te hasta New York e caha a bay. ‘El Negrito Maldito’ a yega di toca di 6or di atardi te pa 6or di mainta riba dos boerderij, na hospital y tambe na Oss. E caha aki ta un relikia di berdad.
Cahanan cu ta coopera cu e homenahe dedica na sr. Ale Werleman ta:
Cahanan di Orgel ‘Sorpresa’ di Fai Koolman, ‘Kibrahacha’ di Fein Gomez, ‘Sabor Crioyo’ di Lorens Koolman, ‘El Trobador’ di Roque Koolman y naturalmente ‘El Negrito Maldito’ di Ale, tambe lo t’ey.
Tin presentacion di Grupo di Baile, Reinanan Cultural, declamacion di Poesia y concurso di baile. E acto oficial lo ta pa 6:30 pm. Naturalmente bar y cushina lo ta bon surti.
Ban hunto celebra y homenagia nos gran baluarte cultural Sr. Gabriel ‘Ale’ Werleman. E celebracion aki lo ta diadomingo 3 di november venidero y lo ta di 5or di atardi pa 9or di anochi na cas di Ale mes, adres Cas Ariba # 13B, Santa Cruz. Bini un, bini tur… Nos ta warda bo!
