Diaranson anochi a pidi asistencia di polis pa un situacion cu a bay for di man na un cas situa den Savaneta. Na yegada a informa e agentenan policial cu un homber a yega na e cas y ocasiona un maltrato fisico.
E homber a yega na cas di su ex, unda el a dal e y despues bandona e sitio pa bay su su cas na Pos Chikito. Polis a presenta prome na Savaneta y aki e dama ta bisa cu e ta desea di entrega un keho contra su ex pa motibo di maltrato. Tambe el a sigui bisa e unico motibo di tin contacto ainda cu su ex ta p’e yiunan y pa nada mas.
Despues di a tende e declaracionnan di e señora, polisnan a bay Pos Chikito p’e homber. Na nan yegada, e agentenan policial a papia cu e homber y a splic’e e motibonan di su detencion. Di biaha a detene y transport’e pa warda di polis San Nicolas, unda e tin di presenta dilanti subfiscal pa splica riba su acto cometi contra su ex pareha.
