E ta un situacion hopi lamentabel cu por tabata mucho mas pio. Diaranson merdia un famia a yega ImSan c’un menor pidiendo pa ayudo anto cu urgencia.
Ta despues cu den bario di Sabana Basora Noord, dos hoben menor tabata tira klapchi. Despues cu un a los un klapchi cu a cay cerca di e otro, e no a keda contento y a baha carson y boxer di e otro y rementa un vuurpijl cerca di su parti priva. Un ta di diescuater aña y e victima tin diescinco. Christopher Pak ta e victima y su tanta ta Patricia Pak.
Ekipo di 24ora.com a bishita cas di famia Pak p’asina nan conta kico exactamente a sosode. E situacion no lo termina aki. Na nan yegada di ImSan a informa polis di e situacion. Na nan turno a conseha famia pa entrega un keho oficial na recherche. E caso aki ta mustra cu lo crea un rabo largo.
Aunke ta trata di menor, por spera cu por lo menos polis lo bishita cas di e otro hoben pa por lo menos dun’ e un bon scual. Segun bisiñanan, e hoben di diescuater aki ta terorisa e bario constantemente. Sa papia cu ne pero ta parce cu e no ta ricibi atencion suficiente for di su mayornan.
E kemadura na curpa di Christopher ta di atencion, a cuminsa na trat’e pero tin cu sigui cuida pa e dianan nos dilanti.
