Diasabra marduga, pa mas of menos 2:00 am, a dirigi un patruya na altura di Pos Abao, despues di a haya informacion di un posibel pelea. Sinembargo, ora a yega n’e sitio, no a bin topa cu ningun di e personanan envolvi den e conflicto.
Despues, danki na un tip anonimo, a localisa un Nissan March colo ros, numera -30495 para dilanti ca’i hende. Mientras cu e buskeda den e area tabata continua, polis a descubri un hoben scondi bao di un mata, supuestamente drumi, manera un ‘security bao palo’.
Ora a papia cu e hoben, esaki a mustra sospechoso. Polis a saca afo cu e tabata purba di sconde ora cu polis a yega. Fuera di esey, nan a haya sa cu e hoben t’e chauffeur di e Nissan march y lo a para e auto dilanti un cas di un persona desconoci, tur esaki sin tin un rijbewijs valido. A bin haya yabi di e auto den su poder, cual polis a kita fo’i dje, pendiente p’e doño bin busca esaki.
