Su nomber completo ta Catharina-Amalia Beatrix Carmen Victoria. El a nace dia 7 di december 2003 y ta e princes heredero di trono di Reino Hulandes. E ta e yiu mayo di su mahestad, Rey Willem-Alexander y Reina Maxima. Su altesa real Prinses Amalia a bira heredero di trono asina cu su tata a asumi e funcion di Rey dia 30 di april 2013. Cu 10 aña di edad, el a bira Prinses van Oranje. Pero awe, cumpliendo 18 aña, e ta cla pa asumi e funcion di Reina asina cu su tata fayece of abdica di e funcion.
E pareha real tin dos yiu muhe mas, cu ta prinses Alexia (2005) y prinses Ariane (2007). Nan ta biba na paleis Huis ten Bosch na Den Haag. Ta bon pa agrega cu prinses Amalia ta papia cuater idioma, cu ta Hulandes, Ingles, Spaño y Chines (Mandarin).
Na juni ultimo, e prinses a gradua na Christelijk Gymnasium Sorghvliet y a caba VWO. El a opta pa tuma un aña di break, prome cu e sigui studia. El a opta pa no acepta e salario si 1.6 miyon Euro cu e tin derecho riba dje asina cu e bira mayor di edad, pasobra e no kier cobra nada tanten cu e no ta traha pe.
Locual lo cambia awo mesora den su bida ta e rol activo cu e ta cuminsa hunga den Raad van State di Reino Hulandes. Su tata, Rey Willem-Alexander ta e presidente. E ta bira un miembro activo y hasta lo tira un discurso eyden. Un cos si el a bisa caba cu, mescos cu su wela y su tata, e tampoco lo no participa activamente den procesonan electoral, pues lo no haci uzo di su derecho di voto pa Parlamento nobo di Hulanda.
