E situacion cerca e dokternan di cas ta preocupante y ta pa e mesun motibo ey HAVA (Huisartsenvereniging Aruba) a manda un carta pa gobierno cu caracter di urgencia, mirando cu pocopoco nan ta mirando e cantidad di pashent ta aumenta, pa asina poco dokter.
E carta ta bisa lo siguiente:
“Nos como dokternan di cas (HAVA) kier pidi boso atencion pa e situacion critico cu boso lo ta enfrentando dentro di poco tempo y ya ta mustrando su prome efectonan. Practicanan di dokternan di cas tin retonan grandi pa varios aña caba pa mantene cuido na un nivel aceptabel pa nan pashent door di falta di inversion y adaptacion di e presupuesto di huisartsenzorg (prome linea di cuido). E ultimo contract firma cu AZV ya caba ta di 2013 y gastonan operacional a sigui subi door di inflacion, costo di material y personal y exigencianan den servicio di calidad stipula door di AZV. Esaki ta nifica cu pa paar di aña caba practicanan di dokter di cas no por cubri nan gastonan eficientemente cu resultado di tin presupuesto net riba rand di balans of negativo. Dokternan di cas no por ni permiti nan mes un pensioen of seguro di incapacidad (arbeidsongeschiktheidsverzekering) locual ta un derecho pa tur empleado medico.
Actualmente tin 46 dokter di cas na Aruba pa 107.576 asegurado di AZV. Esaki ta resulta den praktijknan cu un promedio di 2.350 pashent pa cada dokter di cas. Un cantidad cu awendia no ta manehabel mas locual ta pone hopi presion riba e servicio y disponibilidad di e oficinanan creando un domino-effect riba e cadena di cuido cu e pashentnan atendiendo na Eerste Hulp di Hospital y ImSan innecesariamente (na Hulanda e promedio actual ta 2.095 y tin hopi praktijknan cu cantidad mas abou). Esaki ta crea ineficiencia den e structura di cuido cu gastonan mas halto pa AZV y Salubridad Publico.
Door di e pandemia di COVID-19 AZV riba instruccion di gobierno a dicidi di corta 5% riba e presupuesto di tur dunadonan di cuido.
For di principio di solidaridad, HAVA y su miembronan a dicidi di no bay den protesta y a tuma un recorte di 4.125% riba e presupuesto di e praktijknan. Nos kier enfatisa cu presupuesto no ta igual na entrada di dokternan di cas. E gastonan di personal, utilidadnan y huur/hipoteca y material por ehempel no a baha. Esaki ta nifica cu e presupuesto cu ya caba pa varios aña tabata hopi preta a pone praktijknan bay den situacion critico. Esaki a pone cu dokternan di cas a dicidi di corta den nan servicio ya cu no por a corta den gastonan operacional. AZV a lanta un caso sumario contra dokternan di cas pa esaki y e dokternan di cas lamentablemente a perde nan caso contra AZV.
Actualmente nos situacion financiero no a cambia. Door di e situacion precario locual cu nos a premira y a alerta AZV y gobierno riba dje aña pasa ta birando realidad. Pa September 2021 lo tin 12.500- 15.000 pashent cu lo keda sin dokter di cas door cu 5 praktijk di dokter di cas lo bay cera nan porta. Nos a sondea den nos seno y tin mas colega cu lo tuma e decision dificil mirando cu e situacion no lo cambia por lo pronto. Pa e motibo aki nos kier bati alarma na pueblo pa e situacion alarmante cu ta wordo crea actualmente y ta urgi AZV y gobierno pa tuma e pasonan necesario pa yega na un solucion prome cu te mucho laat y daño ireparabel wordo haci na salud di nos ciudadanonan y structura di nos Salud Publico en general,” ta loke cu e carta a bisa por ultimo.
Loading…
Reload document
Open in new tab 
