Dokter di cas y president di Asociacion di Dokternan di Cas (HAVA), Dokter Joaquin van Trigt, ta informa cu e retonan cu Aruba ta enfrenta pa loke ta cantidad di dokternan di cas aworaki y tambe e parti financiero, ta den discusion cu AZV tambe over di un contract nobo.
Esaki ta un contract cu ta wardando hopi tempo riba dje y HAVA ta spera cu por yega na otro hopi lihe.
“Esey tambe lo ta un manera hopi mas miho y ta duna nos mas forsa pa por atrae tambe y competi cu e mercadonan rond di nos cu hopi biaha toch ta duna un parti financiero mas amplio cu na Aruba.” Segun Dokter van Trigt, esaki ta un motibo pa kico e dokternan di cas no ta scoge pa bin Aruba pa motibo cu e pago no ta igual.
DEN PROCESO DI NEGOCIACION
Esey ta algo cu tin hopi reto cu ne, ta spera di por bini cu esaki pronto pa atrae mas dokter for di exterior pa Aruba pa reenforsa e ekipo. “Nos ta den proceso di negociacion, pues nos ta spera hopi pronto por yega na otro y sera un contract nobo cu nos tur por ta contento cu ne.” Dokter van Trigt a sigui splica cu tempo tabata trata cu BIG-Registratie , e ley tabata permiti solamente dokter cu tabata tin e registracion aki cu ta bin di Hulanda of Belgica. Aru-BIG a bin den vigor y ta mirando kico ta e posibilidadnan awor pa toch atrae otro colega cu tin e experiencia y cu lo fit bon cu e sistema di Aruba.
