Relaciona cu e ultimo desrayonan cu e casonan di pedofiel, Dany Marquez, lider di Grupo Ta Basta a sali y vocifera su preocupacion y perspectiva riba e casonan aki. El a elabora riba e casonan y tambe e status di gobierno relaciona cu e tantisimo carta cu a dirigi na gobierno.
Marquez a comenta riba e caso di Weert, camindae señala cu no ta prome biaha cu e ta comete tipo di acto asina, cu na Corsou el a scapa y a bin Aruba pa eherce e funcion di periodista. A comenta riba e casonan actual caminda cu a pidi diesdos aña di prison. Ta mustra cu e pedofiel no a ricbi ayudo profesional. A comenta riba e pedofiel Geeman cu a abusa di un mucha di cinco aña y tambe riba e otro pedofiel, docente di setenta aña cu a abusa di un mucha homber cu a hasta lag’e herida.
Grupo Ta Basta no sa kico mas gobierno ta warda pa cuminsa atende cu e situacion di pedofiel na Aruba. Ta sinti cu e importancia di gobierno y parlamento no ta na su luga. A reuni den parlamento riba diferente tema, entre otro Eagle LNG pero pa atende cu abuso di mucha no tin tempo. E prome manifiesto cu Ta Basta a entrega na parlamento y gobierno, ta riba 3 di juli 2020, pues casi dos aña. A entrega como seis carga cu e mesun bintiun punto, pero te awe no a haci nada. “Kico mas tin cu pasa pa e ministernan concerni haci un trabou” asina Dany Marquez di Grupo Ta Basta a indica.
Ta varios ocasion a pidi parlamento pa yama un reunion riba abuso di mucha, pero te awe; nada! Ta Basta ta papia cu hopi victima, casi diariamente ta atende cu nan y cu kier haci denuncia. Mirando cu ningun pedofiel a ricibi un castigo halto, e otronan no ta haya e miedo pa keda sin hacie. Presidente di Parlamento, Edgard Vrolijk a yama Grupo Ta Basta pa reuni cu nan, a nenga e reunion mirando cu nan kier pa e yama un reunion publico y atende cu e leynan cu tin mester di atencion urgente pa evita cu e pedofielnan ta haya poco aña ora cay cera.
