Diamars atardi Grupo Pueblo Preocupa a vocifera nan preocupacion relaciona cu e aumento di gasolin. Specialmente na Prome Minister, mr. Eveline Wever-Croes y Minister Xiomara Maduro.
Awe un biaha mas Pueblo Preocupa ta sali como e bos di pueblo pa vocifera e inhustia y abuso cu nos hendenan ta ricibiendo for di e gobierno actual. Gabinete Wever-Croes II tin cinco aña gobernando bou puro medida.
Riba un dia di hende muher, na luga di duna otro pabien y admira otro, ta sinti cu mester duna pueblo un aliento di solidaridad y apoyo pa cu e abuso aki.
Gabinete Wever-Croes a dicidi di no continua cu hedging y alabes a kita e recorte di 10 cent riba accijns. Un recorte cu gobierno nan anterior no tabata cobra e pueblo p’asina tene e prijs di gasolin un poco abou. Desde 2018 Minister Maduro a kit’e y pueblo kier sa ta pa kende e placa ey a bay.
Awe pueblo mester sufri un biaha mas, pa mal maneho, cu mester tene cuenta cu e prijs internacional di crudo. Esaki lo ta mane un domino effect.
Prijs di awa y coriente ta bay subi, tarifa di transporte ta bay subi. Nos local mester bay paga un tarifa mas halto pa nan por yega trabou. Turismo lo bay sufri, tarifa di taxi lo bay aumenta. Producto nan di consumo lo bay aumenta, pero entrada nan ta keda limita y asina tambe gobierno ta keda kita e 12.6%. Consecuencia di mal maneho di Gabinete Wever-Croes awe no ta gasolin so sino ta tur cos ta bay subi.
Cu e aumentonan aki y e mal maneho e lo tin consecuencia economico, social devastador pa pueblo y turismo. Aruba lo bira un isla asina caro y inpagabel. Con Gabinete Wever-Croes kier pa famianan completo por cumpli cu nan gastonan basico y sobrebibi diariamente si ta keda suta e pueblo cu medida.
Aruba tabata conoce diferente klase y awe Gobierno kier crea e klase rico (friends & family) y e klase margina (pueblo).
Nos di Pueblo Preocupa ta haci un yamada n’e pueblo pa boso yena di curashi y lanta para pa boso derechonan. No permiti mas pa Gabinete Wever-Croes sigui margina nos pueblo. Union di un pueblo ta e poder pa liberashon di tanto abuso!
