Ultimamente tin varios keho rib’e servicio di internet rond di Aruba, na diferente area y bario. Na Wayaca y Wayaca Residence, un grupo di 130 persona a bini hunto y firma un peticion pa mehora internet.
Eddy Prins, pensionado y residente di Wayaca Residence ta conta nos cu mas o menos cinco of seis aña pasa, a cuminsa uza internet mas y mas. E problema ta mas largo segun Prins. For di tanto aña pasa caba tin problema cu internet n’e area aki di Wayaca. Setar a bini y haci un cantidad di trabao pa purba na drecha esaki.
E internet despues a keda bay cada biaha, hayando nan ta bin bek pa cambia router y despues atrobe algo otro, anto asina el a keda sin cu bin un solucion real.
“Asina e ta bay. Aña tras di aña mas y mas problema.” E residente di Wayaca Residence ta conta nos cu dos aña pasa nan a bolbe bin y pone kabel nobo atrobe, den un luna a instala tres router nobo pa motibo di un fout di fabrica.
SETAR TA LAGA HENDE NA CAYA
Liña di telefon tambe ta malo. A purba na comunica cu Setar pa entrega tur e firmanan aki cu a colecta di hendenan disgusta cu e servicio, hasta esaki ta bira un dolor di cabes pa haci, segun sr. Prins. “E firmanan ta pa e director y ami kier duna e director. Te cu awor mi no a haya afspraak ainda, e director mester sa cu tin problema, e ta e unico cu por bin cu solucion p’e problema.”
A manda carta pa Setar aña pasa y te ainda tampoco a haya contesta. “Mi ta hay’e hopi malo. E ta un compania basta bon pero e ta laga nos cay hopi. Ami t’un pensionado y mi gusta ora yama mi famia na Hulanda via Web, WhatsApp, videonan y yamadanan ta keda cay.”
Ta papia aworaki di mas o menos cuater pa cinco aña. E meneer aki ta paga mas o menos 172 florin pa luna, pa haya un servicio di e forma aki. “Ami no ta worry cu e placa, mi kier mi servicio, mi cable. Ora bo cumpra un pizza y bo haya dos slice aden, bo no ta contento tampoco, bo kier ful e pizza toch.
Esey ta aña tras di aña mesun storia, mesun problema.” Tur hende den Wayaca Residence ta rabia cu Setar pasobra no por mas den e situacion asina ki. “Mi no sa kico mi mester haci. Mi tin cu haya e director esey ta e unico manera pa Setar lanta haci algo y soluciona e problema.”
