Dialuna net prome cu merdia a sosode un caso di agresion basta serio. Bou di e dak di un snack cerca di EPB Hato un grupo di cinco pa seis hoben a yega arma y agredi un otro hoben. Nan tabata tin biga cu hero den nan man. Sin puntra a yega cuminsa agredi e hoben studiante. Parce e guy ta un hoben basta trankil. Asina mes nan a bati e guy malamente den forma sorpresa.
Hendenan cu un Kia Rio a bati alarma y baha yuda. Nan mes na dado momento mester a defende nan mes contra e grupo di hoben abusado cu kier a agredinan y manda boter cu piedra riba nan auto. Polis a yega y cuminsa busca.
A haya e victima na e snack y a tuma informacion. A pidi ambulance pe. El a haya golpi na su wowo entre otro. Un di e agresornan tambe a haya sla y a core bay despues. Polis a topa cu ne banda di Sisalstraat. Pe tambe a pidi ambulance. El a purba pasa pa victima mientras testigonan ta bisa cu e ta un agresor.
E victima a bisa polis cu e agresornan a bay cu su tas y telefon celular y otro propiedad mas cu e tabata tin den su tas. Esnan eybanda di scol a cuminsa cansa di tur e problemanan cu e hobennan aki ta causando cada biaha. E ta birando manera un menasa pa nan. Inseguridad presente pa esnan cu ta biba of traha rond di scol. Te asina leu no a tende di detencion.
