No por kita un tereno erfpacht for di un persona sin mas. A pesar cu nan no ta cumpliendo cu e ley di erfpacht. Esaki ta loke cu Prome Minister mr. Evelyn Wever Croes a splica den su ultimo conferencia di prensa.
Aruba tin un problema serio pa loke ta tereno pa vivienda. Tin un necesidad grandi pa tereno, mientras cu di otro banda tin hopi tereno otorga cu e ciudadano sea nunca a haci algo cu ne, of a pone un piso y nunca mas a sigui cu e construccion. Rond Aruba, ademas di e casnan den mal estado bandona, tin tereno unda por mira cu solamente a lanta algun muraya.
Pero gobierno no tin tampoco un idea di cuanto tereno ta papia aki. Esaki ta mustra un necesidad grandi pa un inventarisacion.
Prome Minister mr. Evelyn Wever Croes a splica cu kita e tereno cu tin un cas bandona riba dje, ta un procedura hopi complica. Aruba tin leynan cu ta protege e propiedad di un persona, aunke cu e ta erfpacht. Pero den cuadro di e problema di escasez di vivienda, gobierno a cuminsa cu un sistema di inventarisacion.
Na prome instante a tuma nota cu tin tereno cu no tin nada construi riba nan. Esaki por kita mas facil for di e persona na kende el a wordo otorga. Pero den e casonan unda tin un cas completo construi, ta poco mas complica. “Nos ta cuminsa cu e terenonan riba cual no tin nada construi y sigui bay riba e otronan. Poco-poco nos lo haya un miho bista.”
Tambe a splica cu na momento cu un persona no paga su erfpacht, ley ta duna gobierno e herment pa bende e cas na findishi pa caba di construi e cas.
Loke a tuma nota di dje cu mayoria di e peticionnan cu tin aden ta pa tereno na Sero Colorado, unda e casnan ta den hopi mal estado. Ya caba na 2020, e minister di e tempo ey (drs. Marisol Tromp), a cuminsa cu un investigacion forensico, ya cu e tabatin indicacion di iregularidad. Tin un maneho cu un trahado di DIP no por haya tereno of cas, y toch a constata cu varios trahado di DIP a haya mas cas den Sero Colorado pa cual a cuminsa cu e investigacion. “Lamentablemente e investigacion aki no a keda cla pa diferente motibo…”
Prome minister a bisa cu nan ta spera riba resultado di e investigacion, pasobra tin un plan di desaroyo pa Sero Colorado y e areanan cu no ta desaroya ainda. Ey tin varios cas y tereno cu por otorga. “Mi ta kere cu pariba di brug tin hopi mas espacio cu pabou di brug. Nos tur ta wak’e y esey nos ta bay traha riba dje.”
