E tabata un candela grandi cu a impacta sentimento di henter nos comunidad. Ta trata di e candela na cas di Archie Rasmijn di 28 di december ultimo na Santa Cruz. E tabata un candela feroz cu a causa hopi daño. Yudella Chirino ta fungi como vocero di Archie Rasmijn y su casa. Actualmente ambos ta den un situacion di atencion mirando e kemadura di 1 grado cu a ricibi.
Ta apenas awe riba 30 di december nan a sali for di hospital. Nan ta ta recuperando pero pocopoco. Pueblo ta reaccionando na un forma positivo. Chirino a conta cu e sosten ta uno masal. A ricibi tur tipo di donacion. For di paña, meubel, cuminda y mucho mas. Archie y Ling no a keda cu nada despues di e candela. A indica cu for di gobierno mes, esta e minister -y parlamentarionan, no a tende nada for di nan, asina mes cu Archie ta biba den curason di Santa Cruz.
E ta spera cu pronto por ricibi atencion di parti gobierno pa cu e situacion aki. Na nomber di famia, Yudella ta gradici pueblo pa yuda y sostene Archie y casa den e momentonan dificil aki. Mientrastanto nan tin un dak riba nan cabes. Por tuma contacto cu Yudella Chirino na 7479999 p’asina ricibi tur informacion necesario. Esta sea pa donacion di cuminda, paña y mucho mas. Por haci transferencia tambe na: Enalia Chirino | Banco di Caribe | 80200004
Roman Moreno ta un hoben di 16 aña, e tabata e persona cu a drenta den accion ora a mira vlam. Personalmente e no conoce Archie y Ling. Pero debi cu ta pasa diariamente riba e ruta aki, e sa mira e pareha ta sinta pafo. Durante e candela, Roman a drenta den accion y yuda pa saca famia for di cas. E ta contento cu por a yuda y rescata tanto Archie y Ling for di e cas.
