Awe Aruba tin 102 caso nobo di COVID-19, di cual 98 ta residente y 4 no-residente. Esaki ta algo alarmante pero na mes momento hospital a informa aunke cu tin espacio nan ta yenando. Tambe Hulanda a pone Aruba como destinacion di risico pa biaheronan.
Prome minister, mr. Evelyn Wever-Croes, a bisa cu na momento hospital yena, mester stop cu e proceduranan electivo. Tur esaki lo pone cu otro hende mester warda. Un otro cos cu a pasa pa Aruba, ta cu Hulanda un biaha mas a pone Aruba code oranje. Esaki ta debi cu a pasa e cantidad di 500 caso activo. Esaki ta nifica cu desde 24 di maart pa 12:00 am, ora di Hulanda, esunnan cu yega di exterior tin cu bay den cuarentena. Banda di esey, esunnan cu yega Hulanda di Aruba desde 27 di maart, tin cu haci e COVID test.
Esaki tabata loke gobierno kier a evita ora a presenta un plan siman pasa con pa evita cu tin di escala medidanan. Siman pasa el a pidi tur hende pa hala faha mara, pero hopi a cuminsa discuti di cuanto hende ta na mesa sinta. Pero awe por mira e resultado. Segun e mandatario, no ta culpa di ken a bira malo, pero e consecuencia ta pa henter Aruba.
Un biaha mas prome minister ta pidi tur ciudadano pa cuida nan mes y pa limita movecionnan. Esaki ta nifica pa limita na loke ta esencial y no warda pa ora gobierno bin cu regla, prohibicion, cera luganan mas trempan, toque de queda mas trempan, shelter in place. E ta conseha tur hende pa bin cu nan mesun reglanan.
