Gobernador a tene su tradicional discurso, riba bispo di Pasco, den cual el a manda mensahe alentador pa e pueblo. No solamente el a repasa tur loke cu a pasa den 2020, y a elogia e pueblo cu no a sucumbi bou di e crisis, pero tambe a duna palabra alentador pa 2021.
“Durante 2020 nos a bira testigo cu e poder, inteligencia y logronan di humanidad, a bira irelevante compara cu nos balornan y necesidadnan mas basico. Na Aruba e no tabata diferente: nos por a wak cu nos propio wowo con nos isla tabata desola, keto y sin actividad. Tur loke nos a logra den e ultimo 50 añanan di desaroyo tabata tranca nos dilanti sin por haci nada. E aña aki mundo completo a dal para. Y prome cu aña bolter aki par di dia, nos reflexion lo ta mesun profundo cu e impacto di e pandemia den nos bida cotidiano.”
Pero banda di esaki, tambe el a manda mensahe pa encurasha e pueblo den loke mester bini den 2021. Palabranan pa duna e ciudadanonan animo y sigui lucha pa bida. “Ban pone un banda e profesianan di desaster, opinionnan infunda y noticianan falso y evita cu esakinan ta domina nos bida. P’esey aunke e pandemia a pone nos sacrifica hopi y limita nos derechonan, a ocasiona tristeza profundo y pone distancianan fisico entre nos y esnan cu nos ta stima, nos no a sucumbi. Nos a pasa den un tempo duro, nos a enfrenta e adversidad y nos a adapta nos mes na e factornan externo cu nos no por a elimina, pero nos no a kibra. Riba esaki nos mester reflexiona y tene speransa. Nos mester duna nos mes e oportunidad, con duro cu nos situacion ta, di saluda e aña venidero cu e mesun optimismo y fe cu nos ta ricibi tur aña nobo.”
El a apela pa siña di tur loke a pasa aden, pa bira mas resistente contra forsanan aheno. “Ban tene den mente tur e lesnan cu nos a siña e aña aki, pa asina nos ta mas resistente na e forsanan aheno cu nos no por controla. Y di berdad, e ultimo cos cu lo caba riba e mundo aki, ta e misericordia divino. E compasion di nos Bon Dios nunca ta faya.”
Aki por lesa e discurso completo di Gobernador Alfonso Boekhoudt y tambe scucha e discurso.
Loading…
Reload document
Open in new tab 
