Diadomingo, dia 3 di december, ta celebra e Dia Internacional di Persona cu Limitacion. Pa hopi tempo Plataforma di Persona cu Limitacion y Sonrisa ta pone enfasis rib’e dia aki pa conscientisa comunidad pa tene cuenta cu tin hende cu limitacion na Aruba y nan tambe tin derecho.
Angelique Perez Kelly, coordinado di Sonrisa, a indica cu e aña aki un bes mas nan ta tene un celebracion pero un tiki mas special conhuntamente cu Gloria na IMAX. Hunto ta bay haci un evento.
Perez Kelly a expresa cu Sonrisa ta gradicido na Gloria @ The Movies pa semper kere den nan personanan cu limitacion y a acepta nan. P’esey nan ta agradecido n’e esaki, cu ta riba un dia special.
Plataforma di Persona cu Limitacion ta traha na tur derecho. Nan ta purba haci nan esfuerso pa tur hende cu tin limitacion, pero “nos tambe por yega den caso mas grandi, edad por a subi.” El a indica cu ta un lastima cu e cantidad di hende cu limitacion pa motibo di accidente a subi hopi na Aruba. El a expresa pa hende tene cuenta cu e parkeerplaats p’esunnan cu limitacion, of si un hende habri negoshi pa tene cuenta cu esunnan cu limitacion.
Evento pa esunnan cu limitacion
Dia 3 di december na Gloria @ The Movies nan ta bay tin un evento pa tur nan clientenan, mirando cu nan tin diferente instancia. Tur e instancianan ta bini hunto cu tur cliente pa asina por mira un pelicula. Tambe lo tin hende pa haci facepainting p’e muchanan, lo tin presencia di Sinterklaas pa entretene e muchanan. Ta haci esaki hunto cu Gloria @ The Movies.
Devin de Veer, representante di Gloria @ The Movies, a felicita tur hende cu ta traha den e mundo ey, pasobra e no ta nada facil. Gloria @ The Movies ta gradici y pa nan sigui haci e bon trabou. Pa Gloria @ The Movies, cu ta cay bou di MetaCorp, ta un honor di forma parti un biaha mas di e dia aki.
Gloria @ The Movies ta habri porta pa bisa bonbini na mas o menos 250 cliente hunto cu nan famia pa mira un pelicula. Aparte di esey Gloria @ The Movies ta duna e clientenan, cu ta registra na un di e instancianan, un popcorn y cos di bebe gratis.
Algun aña pasa Gloria @ The Movies a introduci e super heroe. Eyfo hopi hende ta referi na nan como hende special of cu limitacion. Gloria @ The Movies a introduci esey na nan, ya cu ta considera nan como super heroe. Tur cliente cu ta registra oficialmente na un instancia a haya un carchi personal cu nan cara y nomber. E hendenan aki ta mas cu bonbini pa presenta pa mira un pelicula gratis y haya popcorn gratis.
Pa mas lesa TREMPAN.COM.
