No ta mucho dia pasa cu a pone man riba ex-director suplente di Arubahuis, Señor Glenn Ling. Ta sospech’e cu e lo tabatin un rol activo den caso di corupcion di Arubahuis cu ta carga e nomber di Tulp. E sospechoso principal den caso Tulp ta ex-Minister Plenipotenciario di MEP, Guillfred Besaril. Tin diferente cos cu no a cana segun procedura normal.
Por lo menos p’e ex-mandatario di MEP por a prueba cu el a mal uza su funcion como minister. E tabata gasta placa di pueblo pa probecho personal na ordo di dia. Centrale Accountantsdienst Aruba (CAD) a haci un investigacion administrativo y financiero na Arubahuis. A constata cu Besaril a abusa den gran escala di su funcion como mandatario.
El a uza placa di pueblo pa cumpra wieg di baby, upgrade di business class pa su pareha, come na restaurant sin duna cuenta cu ken ta bay come, haci uzo di VIP-room p’e y su famia sin tene cuenta cu e tin un costo mara na dje, hasta durante periodo di vakantie tabata uz’e. Mientras Besaril ta na Hulanda, tin cuenta di Setar habri na Aruba ta core manera nada no ta pasando, pues sea yiu of famia tabata uza telefon y pueblo ta paga.
Durante e biahenan di trabou tabata paga gasolin, haci compras den supermercado y mucho mas cu cen di pueblo mientras cu tabata haya “vergoeding” apart pa nan caba, pues ta papia di ‘dubbele vergoeding.’ Parce den organisamento di Aruba Dag tambe tin cos cu a bay robes.
En fin, Ling a pasa ocho dia tras di tralie, a deten’e riba 17 di januari ultimo y riba 24 di januari parti anochi a lag’e bay cas. E ta conta cu representacion legal di abogado mr. Demis Illes di DavidKock-Legal, un di e bufetenan mas top di Aruba caminda mr. David Kock ta na cabes hunto cu demas colega abogado, entre nan mr. Vito Carlo tambe. Apart di Aruba, David Kock-Legal tin oficina na Corsou, Boneiro y recien hasta a firma acuerdo di aliansa di Diaz-Reuz na Miami, Florida.
Ling despues di pasa hopi ora di interogacion, a logra bay cas prome cu Dia di Betico, caminda ainda e tin chens di come un dushi cala y kisas tin espacio ainda pa un pan boyo. No ta kita cu durante e presentacion di Centrale Accountantdienst Aruba (CAD) den Parlamento di Aruba, e funcionario a indica cu a constata cu Land Aruba ta paga awa, huur, coriente, gas, telefon y gastonan mensual tanto di e minister, representante di Aruba pa Union Europeo y hasta p’e director suplente e tempo ey.
Segun CAD, esaki no ta corecto, cual tq e gastonan cu nan mes tin cu paga, ni na Aruba Land ta paga coriente cu awa pa minister. Headlines Group lo bay investiga si ainda Land Aruba ta pagando e gastonan mensual aki p’e director nobo di Arubahuis, Joselin Croes.
