Harry’s Lottery tabata e luga cu a bende e loteria ganado y manera por a mira riba e borchi den entrada, ta alegria so tabata reina den e luga na momento cu nan a haya sa cu e multimiyonario ta un cumprado di Harry’s Lottery. Pa nan sorpresa e ta nan ruman muhe mes, Glenda Tromp-Geerman.
Fichi y Glenda Tromp ta conoci den bario di Noord, biba na Tanki Flip y un famia hopi stima rond Aruba. Fichi tabata polis pa hopi aña, mientras cu Glenda a traha hopi aña na Reclassering. Nan ta tata y mama di Patrick, Alexis y Daisy Tromp di Tanki Flip.
No a pena pa warda y a bay busca prome palabra di Glenda Tromp na su cas, pa asina e conta nos su sentimento despues di haya sa cu el a bira e prome multimiyonario di Aruba pa e aña aki cu Lotto y e sorteo di Mini Mega Plus.
Henter famia tabata presente caba e ora eynan, a cuminsa yama tur band’i otro pa asina hunto nan comparti nan alergia cu e pueblo, di e noticia extraordinario aki. Su nomber, Glenda Maria Geerman casa cu Fichi Tromp, tabata su introduccion.
Na prome instante, Glenda a bisa cu e no a kere su casa ora el a bis’e cu e ta e ganado di e Lotto. Pero su ruman muhe a tuma contacto cu ne y bis’e di e noticia. Glenda a conta, cu el a comparti algun number cu tur hende pero a tene algun number secreto y no a bisa ningun hende cu el a cumpra tres Lotto extra. Na momento cu el a scucha cu e ganado di e Lotto a cumpra nan Shaba Pastry, e di cu e tambe a cumpra Lotto eynan.
Glenda a laga su casa Fichi bay controla su numbernan, e casa a keda mira, bolbe mira y keda mir’e den su wowo, te cu Glenda a bolbe puntr’e kico e numbernan ta. Fichi a dal man riba mesa y bis’e cu: “Nos a gana e Lotto”.
Durante dia Glenda a haci hopi oracion, a yama tur su hendenan cu no tey mas cu nan awe y bisa nan cu e mester yudansa y awe nan a yud’e. Glenda a pidi Papa Dios pa yud’e caba cu su mision como mayor.
Te na e momento di entrevista ainda Glenda no por a kere cu el a gana, pero e ta berdad e ta e ganado di 3.3 miyon florin. A yama tur su yiunan pa bin cas, pero ningun no kier a kere na prome instante. Glenda awe ta un persona feliz, di por a logra algo cu a pidi di masha tempo pa asina e por caba su mision den bida.
Famia Tromp ta contento y sa cu e placa aki lo bay tin bon uzo p’e. Su yiunan na prome luga. Tin di bisa tambe cu Glenda ta prome biaha a gana, no solamente Lotto pero a gana algo den henter su bida y ta yama Papa Dios danki pa e bendicion aki.
Glenda Tromp na final cu palabra di gratitud na Fundacion Lotto, pa cambia su bida y ta contento cu su so a gan’e. E mes lo presenta pa reclama su premio pero ta hala un rosea prome y disfruta di e noticia.
