Minister Glenbert Croes, kende durante campaña político a sigura di lo elimina e compania Aruparking, awendia a mustra di a cambia di tono. Durante conferencia di prensa semanal di Gabinete Wever-Croes II, e mandatario a expresa cu e tin full confiansa cu su colega di coalicion, Minister di Transporte, Ursell Arends lo sa di implementa e miho maneho, pa cual e ta pidi pasenshi pa wak ki solucion Arends ta bin cu ne prome cu ta husga e ponencia cu su persona a haci algun aña atras.
Segun Croes, e proyecto cu den un gobernacion anterior e exMinister di Transporte, Otmar Oduber a introduci, tabata desastroso pa comercio di Oranjestad y mester a elimina inmediatamente, awor “ta un proyecto cu ta den discusion’ pa cual “ta buscando e miho solucion.” E topico a bin bek den luz publico despues cu Aruparking a cuminsa tene accion di advertencia pa autonan staciona rond di Playa.
Minister Croes: “Na e momento aki ami lo bisa cu mi ta confía mi colega Ursell Arends pa yega na e miho solucion pa loke ta trata e tema di Aruparking. Unico cos ta cu mi ta kere cu ainda tin hopi trabou pa wordo haci prome cu bo ta bisa cu bo tin un decision final.” Asina e mandatario a declara argumentando cu temanan di nos pais ta hopi amplio y busca un solucion pa nan no ta asina facil.
Pa e relato completo, lesa TREMPAN
