Gobierno a presenta e prome reportahe di implementacion di e Social Crisis Plan den cuadro di e fondo presupuestario, pa maneha e fondonan pa 2 aña pa implementacion di e plan. A pesar cu inicialmente e tabata alrededor di 34 mil florin plus e 1 miyon florin cu gobierno di Hulanda a apoya e fondo cun’e pa atende crisis social. Gobierno a anuncia cu e fondo tin un tiki mas placa den dje pa nan cumpli cu tur e metanan di e problemanan social compleho grandi cu tin na Aruba.
Segun Minister di Asuntonan Social y Labor, Glenbert Croes, nan a duna un raportahe di con e avancenan ta bayendo pa cada fundacion of departamento y proyecto. No solamente esey, tambe con a aloca e fondonan te aworaki. Mester corda tur hende cu apenas december aña pasa e fondo a bin cla den Parlamento. Esaki ta un base line, un jump start, unda cu e ta percura, a pesar cu e raportahe ta te cu fin di januari, financieramente e tabata te cu diasabra 4 di april. Tin hopi trabou di aña pasa avansa, pasobra di aña pasa gobierno ta atendiendo cu e crisis social.
E crisis plan tin henter e sector uni tras di e esfuerso aki pa cumpli cu e metanan. Ta mira avancenan caba y por ehempel con e wachltijst ta bahando, ta mira tambe cu e extra personal cu nan tabatin mester cualifica, ta hopi profesional. “Pasobra mare nos por a cumpra mashin pa resolve problemanan social cu tin. Ta tuma hende cualifica, cu conocemento, capacidad y boluntad pa brinda e cuido, duna terapia, duna conseho, duna atencion y duna guia”, e mandatario a bisa. E ta orguyoso di e trabou cu tur departamento, tur instancia, tur fundacion uni ta haciendo.
Minister Glenbert Croes ta masha gradici na Parlamento den su totalidad cu na december ultimo, den forma unanime, tur fraccion a aproba e inter begrotingsfonds social crisis plan. “Nan a exigi nos corectamente pa nos bin raporta cada trimester riba e avancenan. Nos ta raportando aworaki e avance pa loke ta trata proyecto y metanan cu a wordo raporta te cu fin di januari di e aña aki.”
E aña aki dia 26, 27 y 28 di februari e mandatario a sinta den reunionnan di consulta pasobra mester keda midi resultado y midi esfuerso. Segun e mandatario, fracaso no ta un opcion y no por keda sin cumpli cu e meta di yuda e baby cu ta nace, yud’e segun e ta crece, e mucha cu ta crece, e hoben cu ta sigui crece den cuadro di su famia. E ta un pakete total nacional di compromiso pa logra un mehora social, duna tur hende un futuro social nobo pa e problemanan cu ta afectando, menasando e existencia di famianan di muchanan.
No por lubida cu el a costa bida di 2 mucha y e ta costando famia kibra, hobennan cu kisas ta bay scol cu spirito kibra, no sa ki consecuencia lo bay tin riba nan futuro. Mester actua awo, actua hunto. E ta contento cu ful sector social hunto, uni den e esfuerso aki cu no ta compromiso unicamente di un Gobierno of di un partido. Esaki mester ta un compromiso nacional di gobiernonan cu lo bin.
No por bisa cu den 2 aña por soluciona e problemanan, pero e lo por dura 20 aña, e lo tuma un compromiso politico di e proximo Gobiernonan cu bin pa asina keda cana e caminda aki, gana e bataya aki pa brinda tur hende un futuro social nobo cu tanto nan ta kere na e pida baranca aki, asina Minister Glenbert Croes a termina bisando.
