Minister di Husticia demisionario Andin Bikker a haci traspaso oficial di e cartera di Integracion na minister demisionario Glenbert Croes kende proximamente lo ta e minister encarga cu Labor, Energia & Integracion.
Durante e acto aki, e mandatario a gradici Minister di Husticia pa su dedicacion incansabel den interes di Aruba y a expresa cu sin duda lo keda haci un apelacion riba Andin Bikker su experiencia y experticio den cuadro di Glenbert Croes su tarea como e proximo Minister di Integracion den Gabinete Wever-Croes II.
Minister Glenbert Croes ta sumamente agradecido pa e confiansa di minister president pa e encargo nobo cu e tin e honor di carga den Gabinete Wever-Croes II. E cartera aki ta brinda nos e oportunidad pa bay bek na e principionan riba cual pais Aruba a ser funda, a base di respet pa otro y den union. Tur cu a bin Aruba pa lucha hunto cu nos pa construi un miho futuro pa nan mes, ta na mes momento contribuyendo na un miho futuro pa Aruba.
![](https://24ora.com/wp-content/uploads/2021/09/Traspaso-Integracion.jpeg)
Integracion den un pais ta sumamente importante. Integracion ta mucho mas cu djis un permiso laboral y/of di estadia. Integracion ta social, economico y cultural. Cu union y integracion como su meta, minister demisionario Glenbert Croes ta sintie sumamente honra di por sirbi Aruba un biaha mas den Gabinete Wever-Croes II.