Cu un ‘monsterzege’ pa e Partido PVV di Geert Wilders, pueblo a papia na Hulanda y den exterior y a mustra di ta fada di e mal gobernacion di partido VVD. Na aña 2021, PVV a sali na di dos luga, pero a keda for di gobierno, door cu ningun otro partido kier a goberna hunto cu Geert Wilders. E formacion di Gabinete Rutte IV a tarda 299 dia, un record. Den apenas 18 luna el a cay, supuestamente pa via di un diferencia di opinion den e maneho di ‘asielzoekers’. Esaki ta opinion ci Gisele Sint Jaho di patido Pueblo Prome.
Awor nos mester wak cua partido lo ta dispuesto pa goberna cu PVV, cu a logra 37 asiento. Pero ta con ta posibel cu tanto votado a duna nan sosten na un partido di cual e lider a wordo condena pa ‘groepsbelediging’ na aña 2020 y Hoge Raad a sostene e veredicto den Cassatie na aña 2021, pa su expresion: ‘Willen jullie meer of minder Marokkanen’ cu el a bisa na aña 2014?
Den e ultimo añanan tabatin varios crisis grandi cu a tuma luga bou di e mando di minister-president Mark Rutte, e ta Minister Presidente desde aña 2010. Banda di e maneho di migrante, e maneho di clima a laga ‘de boeren’ halsa nan bos. E mal maneho di e daño haci na e casnan na Groningen, maneho durante Covid ainda ta den discusion pa cu violacion di derecho humano. E Kindertoelage Affaire, di cual ainda e mayoria di mayornan y hobennan cu a keda perhudica pa cu e erornan aki, no a haya nan placa bek, ni e compensacion pa cu e daño haci.
Un otro problema grandi ta e falta di mas cu 300.000 cas social pa cumpli cu e necesidad di tin nan propio hogar pa biba aden, specialmente famianan cu yiunan bou di edad di 12 aña. Na e mesun momento, Hulanda tabata obliga pa cumpli cu su responsabilidad den Union Europeo, cual a resulta cu na dado momento no tin comprension pa e cantidad di asielzoekers cu si ta haya un cas cu preferencia.
Geert Wilders a priminti den su programa cu lo pone e Hulandes na prome luga atrobe y caba cu e “Tsunami di Asielzoekers y Migrante”. Esey lo a yud’e gana eleccion, door cu den tur skina di Reino a sinti e efecto negativo di e maneho cu Rutte a presidi. Como cu e gobierno di Hulanda tambe ta e gobierno di Reino Hulandes, nos por spera un cambio. “Hulanda pa e Hulandesnan!” Wilders a grita ora el a logra su victoria.
Si PVV(37) kier logra forma un gabinete, e lo por tin un chens cu partido NSC(20) cu kier cambia constitucion, BBB(7) cu tin un maneho di clima mas favorabel pa e boernan, SP(5) cu ta para pa socialismo y SGP(3) christian reforma, pues no ta islam, net locual Wilders ta propaga. Pero asina ta yega na solamente 72 asiento. Pa logra un gabinete di un mayoria, lo mester tin minimo 76 asiento.
E lo ta bon pa Wilders extende un man di paz na partido DENK, un partido di migrante, mas tanto Turko y Marokkano of PVDD, e partido pa bienestar di bestia, prome cu e invita FVD, cu ta un partido neo-facista. Partidonan GL-PVDA, D66, VOLT y CU ta para 180 grado contra locual PVV ta para p’e. Partido VVD a bisa, cu e perdida grandi ta e mandato di pueblo pa nan no drenta gobierno mas.
E ironia ta, cu como Geert Wilders a bisa na aña 2007, durante un reunion den Tweede Kamer, cu mester bende nos islanan riba Marktplaats.nl y algun dia pasa el a bisa: “Hulanda pa e Hulandesnan”, nos por uza esey pa nos negocia. A bira tempo e ora ey pa nos, como 6 islanan ruman contempla bon, ki direccion nos kier bay. Wilders tabata cla na aña 2007 caba pa deshaci di nos islanan cu ta inclui e teritorio maritimo, algo masha valioso pa Hulanda su posicion geo politico.
Esey ta locual por yuda nos logra un autonomia di berdad y husto, cu ta cuadra cu tur e principionan di Nacionnan Uni. Comparabel cu esun di Groenland (58.000 habitante), cu ta forma parti di Reino di Dinamarca, pero por tuma su propio desicion y firma acuerdo internacional sin cu mester sigui Dinamarca. Algo cu Statuut ta prohibi nos di haci den articulo 28 y pa via di esaki nos no por bira miembro di Caricom.
Algun isla lo scoge pa nan independencia. Ademas, Wilders kier gasta 0 Euro na stikstof, assielzoekers, migranten, Brussel, pues e placa ey por bay na e pago di reparacion pa cu e Historia di Sclavitud Hulandes, toch? Por hasta combina esaki cu repatriacion. Yama e Hulandesnan na Boneiro y Statia y e resto di Caribe Hulandes bek pa nan patria Europeo y e ‘Antianonan’ ta bini bek na nos islanan. Cu otro palabra, en bes cu e politiconan aki na Aruba actua manera ta Hulanda ta manda, nan mester informa pueblo di e balor, derecho y poder cu nos tin. Pa asina parti e recursonan pa henter pueblo di Aruba en bes di malgasta y horta placa di pueblo. Pueblo mester scoge miho, esey ta berdad.
Pero nos mester tene na cuenta, cu e manipulacion politico cu ta tumando luga pa decadas caba ta haci nos hendenan depende di e mesun politiconan. Y tanten cu nos no tin reserva pa ora un crisis dal nos isla atrobe, nos lo keda depende di Hulanda. Esey ta net locual Den Haag kier, cu of sin Wilders na cabes.
