Recientemente Gino Winklaar a ricibi e Landsbesluit di su nombracion como director di Korrectie Instuut Aruba (KIA), entrega pa Minister di Husticia, Siguridad y Integracion, mr. Andin Bikker, den presencia di varios otro hefe di departamento di husticia.
Cu e decreto aki, a keda cla cu e proceso di nombracion oficialmente.
E mandatario a felicita Winklaar pa su esfuerso, dedicacion y perseverancia den e trabou. A subraya cu tabatin hopi reto na KIA, un departamento cu tabata mester di hopi atencion debi cu ora a asumi gobernacion na fin di 2017 a resulta cu desde 2010 pa 2017 KIA no a haya e debido atencion. Pues Winklaar a haya un situacion dificil, pero cu sosten di e Ministerio, Parlamento, Majoor Sergio Quant, dr. Verschuur y e personal di KIA, a logra avancenan importante y positivo na KIA. Na momento di nombra Gino Winklaar den e funcion, a sinti un mehoracion y cu e retonan a minimalisa. A bay asina bon cu aña pasa a hasta haya un rapport positivo di Inspectie di Husticia di Hulanda, algo cu nunca cu pa varios aña no a logra.
Winklaar a reconoce ex-altocomisario Dolfi Richardson como su mentor den Cuerpo Policial y sin lubida su mesun tata, cu ta su mentor principal. Winklaar ta considera su exito na KIA como un exito comparti. Si no ta pa e ekipo cu tin eyden cu ta yud’e tur dia, e lo no a yega unda cu e ta awe. KIA ta un departamento cu tin su retonan y cu ta rekeri hopi esfuerso diario pa mantene e operacion canando.
Awor mas bien mester sigui traha duro pa por alcansa e logronan cu a fiha pa KIA y pa e empleadonan eyden. E meta semper ta pa, den e proceso di encarcelacion, dedica e atencion necesario na e presonan pa nan sali como un miho ciudadano di nos pais despues di cumpli cu nan castigo.
