Durante un conferencia di prensa cu a tuma luga awe mainta, minister di asunto economico, mr. Geoffrey Wever a duna un presentacion recapitulando locual el a presenta ayera den parlamento. Tabata trata aki di e cambionan structural cu lo mester bay tuma luga den cuadro di e reforma economico. A elabora entre otro riba e criterianan di e Landspakket, proyectonan cu tin haber cu stimulacion economico y e presupuesto.
Asina cu e minister a termina, prensa tabatin oportunidad pa dirigi algun pregunta den su direccion. Dado mento a trece e cuestion di aumento di prijs di gasolin pa dilanti, señalando na cu varios ciudadano, entre otro taxista ta kehando riba esaki y a recorda cu den pasado a yega di absorbe cierto porcentahe di e prijs aki y a puntra e minister si esaki ta den evaluacion pa e gobierno actual.
Riba esaki Wever a bisa cu nan tin esaki bou di revision pa wak kico por ta e alternativanan, pero cu si absorba manera a haci den pasado, esaki por crea un buraco otro caminda y e situacion financiero actual di Aruba no ta duna pa esaki.
Pa un relato mas amplio lesa edicion di TREMPAN.
