E partido combina di Sarah Wescot-Williams y Theo Heyliger, United Democrats Party a sa di gana e eleccion na Sint Maarten, segun resultadonan publica diamars, segun e website di noticia, Urdupoint.com.
E isla a tene su eleccion fresco fresco, despues di un crisis politico, despues di un confrontacion cu Hulanda riba e ayudo despues di Horcan Irma, cu a pasa riba e teritorio aki na September di aña pasa.
United Democrats Party, a gana shete asiento di e 15nan cu tin den Parlamento di Sint Maarten, despues cu e votonan a wordo conta.
United Democrats Party ta un amalgama di e partido Democrat di ex prome minister Wescot-Williams y United People’s Party di e politico veterano y ex vice prome minister, Theo Heyliger. Hunto nan a ricibi 5748 voto, cual ta un 62 porciento di e total.
National Alliance di e prome minister deroca William Marlin, a bin na di dos luga cu cinco asiento, gobierno di Sint Maarten a anuncia riba su website. E teritorio a cay den un crisis aña pasa, ora cu e gobierno local a cay atras, ora cu prome minister Marlin a nenga e condicionnan Hulandes pa e ayudo di reconstruccion.
Gobierno Hulandes a priminti 550 miyon di Euro (670 miyon di dollar), den ayudo di reconstruccion, pero a insisti cu un cuerpo special di integridad, wordo instala pa monitorea e gasto, mey mey di e temor pa corupcion.
Horcan Irma a laga por lo menos cuater persona morto riba e parti Hulandes di e isla y 11 riba e parti Frances ora cu el a asota den Caribe y tabata devastador pa e pais cu ta depende riba e industria turistico.
Prome cu e votacion, mas of menos 20 mil votado registra a laga sa cu nan ta buscando pa un cambio pa purba di restaura nan bida despues cu Irma a dal contra e isla, cu a laga su rastronan den e capital Philipsburg, seis luna despues.
