Fundacion Rancho ta preparando pa algun evento den e dianan nos dilanti. Diahuebs e fundacion a cuminsa na anuncia y presenta e plan strategico cu nan a bin ta traha riba dje p’e ultimo lunan di 2020 pa asina finalisa cu un rapport cu a presenta. E plan strategico ta pa por mehora e capacitacion di e fundacion.
Clifford Rosa, ta splica cu e plan ta papia di 2022 pa 2026, esaki tin di haber tambe cu un proyecto financia pa e fondo di ‘Samenwerkende Fonds’ fo’i Hulanda conhuntamente cu CEDE Aruba. Fundacion Rancho ta gradici e financiamento aki cu lo yuda duna un structura di e direccion cu e fundacion lo sigui den e proximo cuater aña.
Durante ful e planificacion a bin varios aspecto dilanti, manera por ehempel e boluntarionan como tambe e comunidad di e bario. Fundacion Rancho como organisacion activo pa mas di 12 aña, lo bay den un fase transitorio pa papia mas tocante e cultura. E cultura lo ta e punto di enfoke. E fundacion kier garantisa e conservacion di e historia y cultura di e bario Rancho, p’asina mehora y por papia di un herencia.
Un di e partinan hopi importante den e plan ta e vision, cual ta papia di ‘Rancho, e curason di Oranjestad’ aki ta papia di un comunidad reconoci mundialmente pa balora y proteha su herencia cultural. Tambe a traha riba nan mision cual ta ‘Salvaguardia Rancho su herencia cultural door di cultiva un ambiente faborabel cu su potencial no limita pa medio di arte, comercio, ofishi, educacion cu ta e fundeshi pa desaroyo social-economico y sostenibel”. Esakinan ta puntonan cardinal pa e fundacion, por haya tur esaki riba stichtingrancho.org
Clifford Rosa ta sigui bisa cu nan ta desea di haya comentario of sugerencia, pero tambe ta pidi pa colaboracion. E colaboracion ta un punto cardinal cu nan lo ta trahando riba dje p’asina por cumpli y mehora e bario di Oranjestad.
Actividad grandiGinelly Quandt ta un coordinado na Centro di Actividad Rancho, a conta cu ta habri aña cu dos actividad grandi. Un di e actividadnan aki ta e careda di boto miniatura, esaki ta tuma luga tur aña riba Dia di Betico. E otro actividad lo ta riba dia 27 di januari, e actividad aki ta e Marshe Rancho, e tema lo ta ‘Plantacion Local’. Quandt ta invita tur persona cu ta planta pa asina pasa y expone nan plantacion. Tur cu kier reserva un tent por yama na 5639388 of tambe por subi e website di e fundacion. Corda abona na TREMPAN
