Fundacion Mi Cutisa a tene un conferencia di prensa na Principal, unda cu lo pasa e documentario di Dande. Lo elabora riba e storia di dande, con el a cuminsa y desaroya cu tempo. Pero pa por a yega na esaki, un team a haci diferente investigacion dje historia.
Arthur Kelly, entrevistado di documentario, a splica cu nan a haci un investigacion di unda Dande ta bini y asina a conclui parcialmente e investigacion. A entrevista diferente personahe cu tin di haber cu Dande, pa por a prepara e documentario. A documenta henter un historia con Dande a cuminsa e temponan aya.
Na 2016 un cineasta cu tabata encarga cu e parti di produccion na Hulanda a acerca Kelly y a cuminsa graba na fin di 2017. Nan a graba desde 26 di december te dia 6 di januari, unda a celebra e cultura di Dande. A realisa cu den e tempo cortico ey, nan no a haya tur cos pasobra momento di bishita hende, nan tabata haya mas hende.
A opta pa bolbe graba den e mesun periodo, pero e biaha aki na 2018 y na caminda a logra termina esaki. Pero e cineasta (producer) a fayece y esey a pone cu nan a pega un rato. Despues a haya Sherman de Jesus, kende ta un productor di Hulanda y a produci e storia di Boy Ecury, cu a tuma e produccion. Den un ambiente ameno a presenta e promocion di e pelicula den sala di Principal.
Alexis Tromp, hefe di departamento di media na Biblioteca Nacional, tambe a contribui den e produccion di historia di Dande. Tromp su rol tabata di regisseur, pasobra nan tabatin mester di un persona cu por a compronde e tarea aki. Tambe el a fungi como e camera man, esey kiermen e regisseur mester compronde henter e mundo di documentario.
Den e documentario ta bay sali afo e parti di discriminacion, rebeldia di e ser femenino y sin lubida e aspecto di machismo. Tambe e generacionnan ta box cu otro. Lo haya e parti interesante di San Nicolas como otro parti di Aruba. San Nicolas tin hopi storia. Segun Tromp, pa keda cerca dje storia di Dande, San Nicolas tabatin un storia pa conta ora di cende kerstboom.
Bertha Wolff-Croes, colaborado di e proyecto, a splica cu e documentario tin e nomber di Documentario Vicente Ras. A bin cu e nomber aki, pasobra Vicente Ras ta e persona cu ainda por a mantene e cultura Dande di tambu. Na e ocasion cu a haya oportunidad di traha e documento aki, e encuentro cu Ruby Eckmeyer y Cindy Kerseborn pero durante presentacion di e tres documentarionan aki na Aruba, a yega n’e realisacion dje proyecto. Ta invita pa bin mira e documentario aki y por cumpra ticket pa e premierre yamando 5670390 of 5618001, tambe por manda un e-mail na [email protected]. E entrada ta 50 florin y e ta cuminsa pa 7:00 pm den sala di Principal na San Nicolas riba dia 27 di december 2021.
