Señora Yolanda, un trahado di snacks cu tin mas di 30 aña biba na Aruba, ta hospedando na e cas di cuido di Fundacion Bethel ya pa mas of menos 7 siman. Algun hende a trec’e y a bin resulta cu ningun hende no kier para responsabel p’e. Fundacion Bethel mes ta yuda hendenan di caya, hendenan den necesidad, hendenan cu tin mester di cuido y awo nan a trece Yolanda aki. Fundacion Bethel a tum’e cu brasa habri pa yud’e.
E tin un situacion malo y mester di un dokter. A brind’e e ayudo di e cas, pero aparentemente awor aki cu ningun hende no kier aporta cu esey, segun Irena Gomes, directora di e fundacion.
Personal di Fundacion Bethel a yama e persona cu a trec’e y bisa nan cu mester busk’e e siman aki. Pero en vano. E fundacion kier yuda, pero no sa con pa cuminsa.
Yolanda mester di un dokter, e no tin papel, e no tin identificacion. E ta bibando na Aruba 30 aña, pero no sa mas.
Ta pidiendo ayudo p’e y e ta bibando den e fundacion. Si por haya ayudo p’e, cual segun e fundacion, Yolanda ta gradici na Cruz Cora, cu nan ta yudando te asina leu cu un tiki cen pa e come. Sinembargo pa paga e fundacion, esey ningun hende no ta haci esaki.
Ta haci un yamado na comunidad pa por yuda, pa asina por yuda Yolanda, pa e por bay bek su luga. En todo caso pa haya un manera pa e por haya un yudansa pe.
Yolanda riba su mes
Yolanda tabata traha na cas di un señora pa 30 aña. Loke e ta haci ta traha snacks pa hotel, y tambe ta bende esaki. Esaki ta algo cu e ta biba di dje. E mes a hay’e cu un stroke. Yolanda tabata un hende hopi saludabel trahando snacks pa hopi hende. Pero probablemente awo Yolanda ta sinta cu man cu no ta move, pianan cu no ta move sin un manera con ta sigui cun’e.
Fundacion Bethel kier yud’e, pero con, nan no sa. Ta dificil pa haya cuido medico ora cu un hende no tin papelnan na ordo. E caso sigur di Yolanda ta urgente. E no tin AZV, e no tin cen, e no tin nada. E ta na e cas di Bethel y ningun famia na Aruba pa yud’e. Tur loke e tin ta conoci y hendenan cu el a traha snacks pe e conoce. Loke ta pidi ta pa un dokter bin y wak Yolanda.
Dr. Vallejo a yega di wak’e, pero no sa e motibo di e problema di su pia y su man. Yolanda tin hopi dolor, su pianan ta hopi hincha y preto. Awo e fundacion tin man na cabes, pasobra no sa kico pa haci cu ne.
Kico lo bay haci
Yolanda por keda cerca e cas di Bethel. Pero mester paga pa e estadia di dje. Bethel tambe ta cumpra zorg pa yuda. Tin cu haci tur cos pa Yolanda. Pa luna, como Yolanda a yega eynan, ta cobr’e 800 florin door cu tin cu cumpra zorg p’e. Ora cu a resulta cu awor ningun hende no kier bin ariba pa paga, y a bisa cu lo busca Yolanda pa hib’e otro caminda. Pero te asina leu, ningun hende no a aparece. Ta manera cu a regala Yolanda na Fundacion Bethel, pa nan resolve su problema.
Ta pidi comunidad si por yuda den un manera of otro, pa Yolanda por keda eynan te ora cu bin cu un areglo pa e bay, e tin un cuenta habri cu no a paga. Si comunidad por yuda pa e bay, Fundacion Bethel lo keda contento cu esaki. Si e kier bay bek su luga, pa nan por yud’e cu esey.
Con pa tuma contacto
Fundacion Bethel tin un pagina di Facebook: Bethel Foundation. Eyriba por yega na e website y tur e trabaonan cu nan a haci den e fundacion. Nan tambe tin un telefon cu nan a buta pa yudansa. Nan mes awor aki tin tres aña di existencia, pero dos aña cu nan ta oficial. Fundacion Bethel ta draai riba propio sosten, nan no tin sosten di otro caminda. Ademas di esey nan tin shete cliente cu no tin un entrada social. Nan ta kedando eyden. Dialuna awo tin cita cu Departamento di Asuntonan Social, unda cu ta spera cu por yega na un acuerdo pa nan por yuda comunidad. Tur yudansa ta bon bini. Nan tin un cuenta di banco tambe cu por pone donacion riba dje.
Pa por contribui cu Fundacion Bethel por hacie via nan cuenta na Aruba Bank number 6012550190 riba nomber di Stichting Bethel Nieuw Begin. Tambe por tuma contacto cu nan via email [email protected] of via nan website arubabethelfoundation.org. Tambe por yama nan na 5681599 of pasa cerca nan na Jim Bluejacketstraat 8 na San Nicolas.
Ban yuda contribui
No solamente por contribui pa yuda Yolanda, pero e fundacion mes mester di hopi cos. Nan tin mester di stoel, cama, en fin, yudansa en general pa su 25 clientenan. Nan ta wardando bishita di ministernan Dangui Oduber y Glenbert Croes. Ta haci un yamado un biaha na comunidad y gobierno en general pa por yuda Fundacion Bethel. Nan tin mester di hopi cos. Ban yuda Fundacion Bethel, pa nan por sigui yuda comunidad.
