Melva Croes-Yanez tabata presente na Misa Adventista di Shete Dia den cuadro cu a recorda e fecha di Dia di Conscientisacion riba Alzheimer. E ta presidente di Fundacion Alzheimer Aruba cu e aña’ki ta celebra 20 aniversario di e fundacion y 21 aña di cinta teal.
El a splica cu esaki tabata prome aña tambe cu a cuminsa cu un luna completo di reflexion riba e malesa di demencia aki, dunando atencion special na e cuidadonan di e pashentnan aki y e maneho pa cu e malesa. “Cuido y trato cu dignidad” ta e lema di e aña’ki. Tur aña e fundacion ta scoge un misa cu nan ta bishita durante e Siman di Cinta Teal pa duna informacion na su bishitantenan. Esaki ta e di dos biaha cu ta bishita e misa menciona.
E misa ta dedica hopi tempo na educa e parokianonan, ta organisa hopi workshop. Pues nan no ta yega e misa solamente pa resa pero tambe duna nan informacion. E tema cu a papia riba dje ta wandromento. Esaki ta ora cu personanan di Alzheimer sali cana sin destinacion y ta perde facilmente.
ALZHEIMER
E malesa di Alzheimer ta un trastorno cerebral cu poco-poco ta destrui e memoria y capacidad di pensa y cu tempo, e habilidad di haci e cosnan mas simpel den bida. Cinta Teal: ta representa e Siman di Conscientisacion; “Siman di Cinta Teal” na Aruba: 21 te cu 27 di september. E flor blanco ta representa e flor “Forget me Not” cu ta hiba e mensahe di ‘No lubida esnan cu nan cerebro ta faya’.
