Diasabra awo, dia 25 di september, Fundacion Alzheimer Aruba ta invita comunidad di Aruba pa asisti na un Santo Sacrificio di Misa special pa e cuidadonan special cu ta dedica na cuida personanan cu tin e malesa aki.
Esaki lo cuminsa pa 7:00 pm, na Misa Imaculata Concepcion na Sta Cruz, cu e meta pa pidi La Birgen Concepcion pa union y apoyo den comunidad pa haci un diferencia den e peso di e cuidadonan aki den cuido di un ser keri/familiar na cas.
E embehecimento (vergrijzing) den nos comunidad y scarsedad di cuidado na cas tin como consecuencia cu mas y mas ta pone un ser keri den un cas di cuido.
E asina yama generacion di e ‘Baby Boomers’ ta conoci cu e cuido di nan mayornan na cas. E generacion ey a lanta cu e educacion cu yiu mester cuida nan mayor ora nan bira grandi. Esey ta posibel pasobra e mayornan di e baby boomernan aki tabatin suficiente yiu, cu maske ta un yiu por a tuma e responsabilidad aki di cuido na cas ora un mayor bira dependiente di cuido.
Ainda tin hende cu a keda cu e custumber aki y hasta lo traha part-time pa ta na cas cu un ser keri cu mester di cuido na cas.
Independientemente di nan circunstancia particular, pa ser un cuidado familiar ta un rol cu su reto. Hopi cuidadonan den famia, probablemente nunca a anticipa e situacion cu nan lo topa den nan bida. Sinembargo, no ta necesario di ta un experto den enfermeria, un superheroe of un santo pa ta un bon cuidado di un familiar.
Cu ayudo y apoyo adecua, e cuidado por brinda un atencion cu amor y eficacia sin tin mester di sacrifica su mes den e proceso. Hasta cu e cuido aki por haci cu e cuidado aki por experiencia sentimentonan gratificante, tanto p’e mes como pa su ser keri.
Tambe cuida un ser keri por desencadena un serie di emocion dificil, cu por hiba na rabia, miedo, resentimento, culpa, impotencia y dolor. Ta importante reconoce y acepta loke bo ta sinti, tanto cos bon como malo y no castiga bo mes ora otronan ta culpa bo di no ta perfecto of di a lubida haci algo.
Hopi ta esunnan cu ta mira como menos ora keda cas pa cuida un ser keri. Ta hustamente e grupo aki ta e grupo cu por cay den soledad, isolacion, hasta depresion y cuminsa haya problema cu salud y c’un chens grandi di fayece prome cu e ser keri bou su cuido. Si abo como cuidado principal di un ser keri cu un trastorno neuro-degenerativo di e tipo Alzheimer bo mester realisa cu bo no por haci tur cos bo so.
Bo mester ayudo di amigo, ruman, miembro di famia, bisiña, profesionalnan, etc. Si bo no ricibi e apoyo necesario, lo bo tin chens di cansa y bo habilidad pa duna cuido lo ta comprometi. Comunidad, Iglesianan, service clubs, gobierno, etc., tin un rol importante pa duna sosten na cuidadonan di un ser keri na cas.
